Pekin, 25 gusht, Zhurnal.mk – Në përgjigje të raporteve që ShBA-ja planifikon të marrë kundërmasa ndaj vendeve që nuk marrin pjesë në sanksionet kundër Iranit, zëdhënësi i Ministrisë së Jashtme kineze Lin Jian deklaroi në një konferencë të rregullt për shtypin të martën se Kina ka shprehur vazhdimisht kundërshtimin e saj të vendosur ndaj sanksioneve të paligjshme e të njëanshme që nuk mbështeten në të drejtën ndërkombëtare ose autorizimin nga Këshilli i Sigurimit i OKB-së. Lufta ekonomike dhe taktikat e presionit maksimal nuk do të ndihmojnë në zgjidhjen e çështjes, po vetëm sa do ta përshkallëzojnë më tej konfliktin, do të shkaktojnë përhapje të rrezikut, do të prishin rendin ekonomik e financiar global dhe do të dëmtojnë të drejtat e interesat e ligjshme të vendeve të tjera. Detyra urgjente është qetësimi i situatës dhe kthimi në rrugën e dialogut e të negociatave sa më shpejt të jetë e mundur.
Zëdhënësi tha se bashkëpunimi i Kinës me Iranin është zhvilluar gjithmonë brenda kornizës së të drejtës ndërkombëtare dhe nuk duhet të pengohet ose të prishet. Kina po vëzhgon nga afër zhvillimet përkatëse dhe do të marrë të gjitha masat e nevojshme për të mbrojtur me vendosmëri të drejtat e interesat e veta.
