Tiranë, 26 gusht, Zhurnal.mk – Ministri i Drejtësisë, Toni Gogu, kërkon që matja e reformës në drejtësi të mos kufizohet vetëm te numri i çështjeve të zgjidhura, kohëzgjatja e tyre apo cilësia e vendimeve, por të përfshijë edhe përvojën konkrete të qytetarit në kontaktin e parë me sistemin.
Në editorialin e dytë të serisë “Shënime mbi drejtësinë”, me titull “Drejtësia nuk nis në gjykatë”, ministri e vendos theksin te aksesi në drejtësi, duke nisur nga informacioni dhe ndihma juridike falas, deri te ndërmjetësimi, shërbimet digjitale dhe gjuha e përdorur nga institucionet.
“Përvoja e qytetarit, nga trotuari ku shkel, te dera që çelet e te përgjigjja që merr, duhet të shndërrohet në tregues të performancës e jo të mbetet shënim në fund të faqes”, shkruan Gogu.
Sipas tij, qytetari nuk e ndan përvojën në sportel nga vendimi që merret në përfundim të procesit. Për këtë arsye, mekanizmat që e ndihmojnë të gjejë zgjidhje, ndihma juridike, ndërmjetësimi, informimi dhe shërbimet elektronike, nuk mund të konsiderohen thjesht si pjesë administrative, por si kontakti i parë i qytetarit me drejtësinë.
Ministri ndalet edhe te digjitalizimi, i cili, sipas tij, ka vlerë vetëm kur e afron shtetin me qytetarin.
“Një platformë që kërkon durimin e një juristi për t’u përdorur, nuk është më shërbim, por një pengesë e re me fytyrë bashkëkohore”, thekson ai.
Gogu sqaron se përmirësimi i aksesit nuk prek pavarësinë e gjykatave, ndërsa nënvizon përgjegjësinë e institucioneve për ta bërë informacionin të kuptueshëm dhe shërbimin të arritshëm.
“Aksesi në drejtësi është prova e përditshme nëse sundimi i ligjit zbatohet apo mbetet në letër. Jo raportet e Brukselit, por dera që njeriu gjen hapur ose mbyllur”, përfundon ministri.
