Tiranë, 3 shtator, Zhurnal.mk – Kreu i grupit parlamentar të Partisë Demokratike, Gazment Bardhi, ka reaguar përmes një postimi në rrjetet sociale lidhur me rritjen e çmimeve të ushqimeve në Shqipëri.
Bardhi shprehet se, sipas të dhënave që referon në postimin e tij, çmimet e ushqimeve në Shqipëri janë rritur këtë vit 5,2 herë më shumë se mesatarja e Bashkimit Evropian.
Ai ngre gjithashtu shqetësimin për situatën sociale, duke pretenduar se 30% e shqiptarëve kërcënohen nga uria.
“Qeveria ka zero reagim”, shkruan Bardhi në postimin e tij.
Në vijim, kreu i grupit parlamentar të PD-së rendit edhe disa nga kërkesat e opozitës për përballimin e situatës ekonomike, mes të cilave heqjen e menjëhershme të TVSH-së për ushqimet, arsimin falas dhe vendosjen e minimumit jetik.
Bardhi e ka shoqëruar reagimin me kritika ndaj qeverisë për mungesën, sipas tij, të masave për të lehtësuar barrën ekonomike mbi qytetarët.
