Tiranë, 3 shtator, Zhurnal.mk – Hemodinamika në spitalin Universitar “Shefqet Ndroqi” është rikonstruktuar tërësisht, ndërsa shërbimi tashmë disponon dy salla moderne, duke dyfishuar kapacitetet dhe krijuar mundësi për trajtimin e një numri më të madh pacientësh.
Ministria e Shëndetësisë dhe Mirëqenies Sociale, bën me dije se investimi ka përfshirë rikonstruksionin e plotë të ambienteve ekzistuese dhe krijimin e një salle të re hemodinamike, e pajisur me një aparat të ri angiografie.
Drejtoresha e spitalit universitar “Shefqet Ndroqi”, Elisaveta Treska gjatë inspektimit të këtyre ambienteve, informoi se funksionimi i dy sallave ka nisur që prej korrikut 2026, duke rritur kapacitetin e ndërhyrjeve nga rreth 10 pacientë në ditë në rreth 16 pacientë, me mundësi për një numër edhe më të lartë.
Sipas tij, infrastruktura e re dhe pajisjet bashkëkohore krijojnë gjithashtu kushte më të mira për trajtimin e rasteve me sindromë koronare akute, pasi prania e dy sallave mundëson vijimin e ndërhyrjeve edhe në rastet kur njëra prej tyre është e zënë.
“Na lehtëson shumë për të trajtuar sindromën koronare akute, sepse në momentin që ke një sallë të zënë, është salla tjetër e lirë dhe manovrimet bëhen kur ke dy salla”, u shpreh një prej mjekëve të këtij spitali.
Përveç rritjes së kapaciteteve, aparatura e re e angiografisë mundëson edhe përmirësimin e cilësisë së imazheve gjatë koronarografisë dhe ndërhyrjeve koronare intervencionuese.
Rikonstruksioni i plotë i ambienteve dhe investimi në teknologji synojnë ofrimin e një shërbimi më të shpejtë, më të organizuar dhe me standarde bashkëkohore, duke ulur kohën e pritjes dhe duke u dhënë më shumë pacientëve mundësinë për të marrë trajtimin e nevojshëm në kohë.
Me dy sallat funksionale të hemodinamikës, Spitali Universitar “Shefqet Ndroqi” synon të rrisë ndjeshëm numrin e ndërhyrjeve koronare dhe të përmirësojë më tej cilësinë e shërbimit të ofruar për pacientët.
