Shkup, 14 shtator, Zhurnal.mk – Ministri i Transportit, Aleksandar Nikolloski, thotë se zhvillimi i një shteti në shekullin XXI varet nga realizimi i investimeve të mëdha, strategjike dhe afatgjata.
“Kjo Qeveri ndjek politikë për të ardhmen”, porositi Nikolloski, duke iu referuar projekteve kapitale të realizuara gjatë javës së kaluar.
Ai veçoi centralin e ri kogjenerativ, ndërtimin e parkut më të madh të erës dhe aeroportin e rikonstruktuar “Shën Apostol Pavli” në Ohër.
Sipas Nikolloskit, këto projekte nuk janë vetëm ndërtime infrastrukturore, por investime për të ardhmen, vende të reja pune, siguri energjetike, lidhje më të mirë dhe ekonomi më konkurruese.
“Ndërtimtaria tashmë për muajin e 18‑të me radhë është në rritje dhe kjo është dëshmi e qartë se projektet kapitale e shtyjnë shtetin përpara”, theksoi Nikolloski.
Ai porositi se investimet që realizohen sot duhet të krijojnë shtet më të fortë për gjeneratat e ardhshme.
