Shkup, 16 shtator, Zhurnal.mk – Arsimi profesional po fiton gjithnjë e më shumë vëmendje në Maqedoninë e Veriut dhe natyrisht ky është lajm i mirë. Sipas të dhënave të fundit, interesimi i nxënësve për t’u regjistruar në shkollat profesionale ka shënuar rritje të dukshme, duke tejkaluar për herë të parë interesimin për arsimin në gjimnaz të përgjithshëm. Ky është një sinjal pozitiv që tregon orientimin e të rinjve drejt profesioneve konkrete, të lidhura me tregun e punës. Por dilema mbetet sesa janë të gatshme shkollat profesionale të përmbushin këtë pritshmëri dhe të nxjerrin profesionistë të mirëfilltë? shkruan Zhurnal.
Interesim i lartë për shkollat profesionale
Zëvendësministri i Arsimit dhe Shkencës, Driton Sulejmani, deklaroi në emisionin “Pas numrave” në TVM2 se këtë vit rreth 10.800 nxënës janë regjistruar në shkollat e mesme profesionale. Ky numër tejkalon dukshëm regjistrimet në gjimnaze, duke reflektuar një ndryshim të qartë në orientimin arsimor të të rinjve.
Sipas tij, ky trend lidhet me nevojat reale të tregut të punës. Ministria e Arsimit, para hapjes së konkurseve dhe paraleleve të reja, zhvillon analiza të tregut për të përshtatur profilet arsimore me kërkesën për kuadro. Kjo qasje synon të krijojë një lidhje më të drejtpërdrejtë mes arsimit dhe ekonomisë, duke përgatitur të rinj me aftësi praktike dhe profesione që kërkohen në sektorë të ndryshëm.
Rritja e interesimit për arsimin profesional shihet si një hap pozitiv drejt përgatitjes së gjeneratës së re për sfidat e tregut. Megjithatë, ky optimizëm nuk mund të jetë i plotë pa u ndalur tek kushtet reale në të cilat zhvillohet ky arsim. Sepse orientimi drejt profesioneve është i dobishëm vetëm nëse shkollat ofrojnë hapësira, laboratorë dhe praktikë të mirëfilltë.
Sa janë të gatshme shkollat profesionale për t’i pritur nxënësit?
Në qytetin e Kumanovës, shkolla profesionale ende funksionon në baraka. Nxënësit ulen tre në një bankë, pa laboratorë, pa kabinete të posaçme për kimi, biologji apo lëndë të tjera praktike. Ky realitet tregon qartë se shkolla është larg profesionalizmit. Në vend që të përgatisë kuadro të aftë për tregun e punës, profesorët detyrohen t’i kufizojnë nxënësit në teori të thatë.
Situata e ngjashme haset edhe në shumë qytete të tjera të Maqedonisë së Veriut. Shumë shkolla profesionale vuajnë nga mungesa e infrastrukturës, pajisjeve moderne dhe kushteve elementare për mësim praktik. Në mungesë të laboratorëve, kabineteve teknike dhe hapësirave për ushtrime, arsimi profesional po shndërrohet në një arsim teorik profesional një paradoks që bie ndesh me vetë misionin e tij.
Kjo mungesë e kushteve reale krijon pengesa të mëdha për nxënësit. Pa praktikë, ata nuk mund të zhvillojnë aftësitë e nevojshme për profesionin e zgjedhur. Dhe kur kalojnë në studime të larta, mangësitë e formimit bazë i ndjekin duke i bërë më pak të përgatitur për tregun e punës. Në këtë mënyrë, shkollat profesionale rrezikojnë të prodhojnë gjenerata të gjysmë‑profesionistëve, të cilët nuk mund të konkurrojnë me standardet e kërkuara
Profesionistë pa kushte nuk ka
Rritja e interesimit për arsimin profesional është një zhvillim i rëndësishëm dhe pozitiv. Por ky interes nuk mjafton nëse nuk shoqërohet me investime serioze në infrastrukturë, laboratorë, pajisje moderne dhe kushte praktike. Shkollat profesionale nuk mund të mbeten vetëm teori ato duhet të jenë hapësira ku nxënësit mësojnë, eksperimentojnë dhe përgatiten realisht për profesionin e tyre.
Kujtojmë që, nëse nuk ndryshon qasja institucionale, rrezikojmë që entuziazmi i nxënësve të shuhet përballë realitetit të varfër të shkollave. Arsimi profesional nuk është luks, por domosdoshmëri për zhvillimin ekonomik dhe shoqëror të vendit. Vetëm me kushte të barabarta dhe investime të qëndrueshme, shkollat profesionale mund të nxjerrin profesionistë të mirëfilltë, të aftë për të ndërtuar të ardhmen e tyre dhe të shoqërisë. /Zhurnal.mk
