Shkup, 18 shtator, Zhurnal.mk – Banka Popullore vendosi që norma e shtresës mbrojtëse kundërciklike të kapitalit për ekspozimin e bankave në vend të mbetet 2 për qind. Norma do të zbatohet nga tremujori i katërt i vitit 2027, ndërsa vendimi është marrë pas vlerësimit të rregullt tremujor të rreziqeve sistemike, mbi bazën e të dhënave deri në tremujorin e dytë të vitit 2026.
Nga Banka Popullore vlerësojnë se niveli aktual është i përshtatshëm për kushtet makrofinanciare dhe gjendjen në sistemin bankar. Sipas vlerësimit, sektori bankar është i qëndrueshëm dhe rezistent ndaj goditjeve, gjë që e konfirmojnë edhe rezultatet e testimeve të stresit, si dhe kapitalizimi dhe likuiditeti i duhur, norma e ulët e kredive jofunksionale dhe fitimprurja solide.
Vendimi lidhet edhe me masat makroprudente të vendosura në fund të vitit të kaluar, si dhe me ndryshimet te rezerva e detyrueshme. Në bilancet e bankave vërehet përmirësim i strukturës së kredive të reja të miratuara sipas treguesve LTV dhe DSTI.
Te depozitat e amvisërive, ndërkaq, vazhdojnë ndryshimet e favorshme në lidhje me strukturën e tyre afatgjatë dhe valutore.
Nga Banka Popullore presin që kjo vendosje e masave makroprudente të kontribuojë në kufizimin e rreziqeve sistemike dhe ruajtjen e stabilitetit dhe rezistencës së sektorit bankar në periudhën e ardhshme.
Lartësia e shtresës mbrojtëse kundërciklike të kapitalit do të vazhdojë të ndiqet dhe të rivlerësohet në bazë tremujore.
