Tiranë, 21 shtator, Zhurnal.mk – Në Kuvendin e Shqipërisë është mbledhur këtë të hënë Konferenca e Kryetarëve, për përcaktimin e projektprogramit të punës së Kuvendit për periudhën 28 shtator – 6 nëntor 2026.
Po ashtu, gjatë punimeve do të shqyrtohet edhe projektkalendari i punimeve të Kuvendit për periudhën 28 shtator – 16 tetor 2026.
Në nisje të mbledhjes, Partia Demokratike është shprehur kundër përfshirjes së Reformës Territoriale në programin e punës së Kuvendit. Kreu i Grupit Parlamentar të Partisë Demokratike, Gazment Bardhi, u shpreh se Reforma Territoriale duhet të vijojë të jetë në procesin e konsultimit publik.
“Partia Demokratike është kundër këtij kalendari që keni paraqitur. Ju keni përfshirë për diskutim projektligjin për Reformën Territoriale. Kjo është një çështje e papranueshme për shumë faktorë”, u shpreh ai.
“Së pari”, – tha Bardhi, “nuk mund të kaloni një reformë kaq të rëndësishme pa konsensusin e opozitës. Gjithashtu, ju zhvilluat një proces tallës me shqiptarët. Ngritët një komision, ndërkohë që ndarjen e kishit në tavolinë dhe e kishit të gatshme”.
“Sot e sillni këtë çështje këtu, të përfshirë në kalendar. Edhe ajo që po bëni sot është një tallje dhe shkelje e Kushtetutës, pasi aktualisht ka një proces konsultimi publik, ndërsa ju parashikoni diskutimin e projektligjit në komisione. Prandaj, ne jemi kundër”, vijoi Bardhi.
