Porsche mund të jetë duke përgatitur rikthimin e saj në botën e supermakinave, më shumë se një dekadë pas përfundimit të prodhimit të 918 Spyder.
Sipas një raporti të ri, modeli i ardhshëm mund të jetë një makinë krejtësisht e re, e pozicionuar mbi 911 dhe me një motor të pazakontë flat-eight, me tetë cilindra boxer.
Porsche nuk ka prodhuar një supermakinë që nga qershori i vitit 2015, kur përfundoi prodhimi i 918 Spyder. Dy vite më vonë u zhvillua edhe projekti 919 Street, i cili do të ishte pasardhësi ideal, por ai nuk kaloi kurrë përtej fazës së modelit prej balte.
Megjithatë, kompania ka konfirmuar se po shqyrton një model të ri të pozicionuar mbi 911. Në mars, një zëdhënës i Porsche-s përmendi edhe termin “hypercar”, ndërsa gazeta gjermane Handelsblatt pretendon se ka siguruar detaje të reja për projektin.
Sipas raportit, modeli njihet brenda kompanisë me emrin “S1” dhe mund të ketë një çmim fillestar prej rreth 500 mijë eurosh, duke e vendosur atë në një kategori krejt tjetër nga 911 GT3 RS, transmeton Telegrafi.
Ajo që e bën projektin veçanërisht interesant është motori. Porsche thuhet se po shqyrton përdorimin e një motori flat-eight, një konfigurim që kompania e ka zhvilluar në të kaluarën, por që nuk është përdorur kurrë në një model të prodhimit.
Madje, disa vite më parë Porsche kishte testuar një prototip të tillë mbi bazën e Cayman. Motori ishte një 5.0-litërsh, twin-turbo, me rreth 750 kuaj fuqi dhe 1,000 Nm çift rrotullues, me kufizues në 9,000 rpm dhe kambio manuale.
Prototipi ishte testuar për më shumë se një vit në rrugët pranë Weissach, por Porsche vendosi të mos e prodhonte, duke vlerësuar se “nuk ishte makina e duhur për atë moment”.
Tani, në vitin 2026, ideja e një Porscheje të fuqishme me motor me tetë cilindra boxer duket se është rikthyer në tavolinë. Ndërkohë, kompania gjermane Ruf po punon tashmë në një motor të tillë, me një njësi 4.4-litërshe twin-turbo që zhvillon mbi 1,000 kuaj fuqi dhe 1,000 Nm, të lidhur me një kambio manuale me gjashtë marshe.
Çmimi i përfolur prej gjysmë milioni eurosh përputhet edhe me strategjinë e re të Porsche-s, e cila synon ruajtjen e përfitueshmërisë edhe nëse kompania shet më pak automjete.
Detaje të reja për projektin mund të zbulohen më 7 tetor, gjatë “Capital Markets Day” të Porsche-s, ku kompania pritet të prezantojë planet e saj të ardhshme.
Në atë ngjarje mund të ketë gjithashtu informacione për pasardhësin elektrik të Macan-it, modelet 718 Boxster dhe Cayman me motorë me djegie, si dhe SUV-in e ri me tri radhë ulësesh, i cili do të pozicionohet mbi Cayenne.
Ndërkohë, rikthimi i një 911 GT2 RS besohet se mund të ndodhë në vitin 2027, duke shënuar kulmin e gjeneratës 992.2.
