Shkup, 23 shtator, Zhurnal.mk – Me rastin e 10‑vjetorit të hapjes së kompanisë Gentherm në TIRZ Prilep, drejtori Goce Dimovski sot mori pjesë në shënimin e jubileut të kompanisë, me të cilin përmbyllet një dekadë punë e suksesshme, zhvillim i vazhdueshëm dhe partneritet në kuadër të zonave teknologjike industriale zhvillimore.
Në fjalën e tij, Dimovski përcolli urime për menaxhmentin dhe të punësuarit e Gentherm Maqedoni për jubileun, duke theksuar se prania dhjetëvjeçare e kompanisë në TIRZ Prilep është shembull për rëndësinë e marrëdhënies partneritet mes institucioneve dhe investitorëve të huaj.
Ai nënvizoi se investime të tilla kanë domethënie shumë më të gjerë ekonomike, jo vetëm përmes hapjes së vendeve të punës dhe rritjes së eksportit, por edhe përmes krijimit të mundësive për zhvillimin e ekonomisë vendore, avancimin e kapaciteteve prodhuese dhe fitimin e njohurive e aftësive të reja.
„Vendimi i një kompanie multinacionale për të investuar në Maqedoni është një hap i rëndësishëm. Por, edhe më e rëndësishme është që ajo kompani të vazhdojë të punojë, të zhvillohet, të investojë te njerëzit dhe ta shohë vendin si pjesë të strategjisë së saj afatgjatë. Kjo është vlera e vazhdimësisë. Dhe pikërisht këtë e shënojmë sot. Për vendin tonë, prania e kompanive si Gentherm ka rëndësi që tejkalon kuadrin e një investimi të vetëm“, tha Dimovski.
