Vinicius Junior është në qendër të vëmendjes te Real Madridi pas paraqitjes së dobët në derbin ndaj Atletico Madridit, ku Jose Mourinho vendosi ta zëvendësonte brazilianin në minutën e 54-të, ndërsa skuadra ishte në disavantazh dhe me një lojtar më pak.
Zëvendësimi në derbi mori rëndësi të veçantë edhe për shkak të momentit të ndeshjes. Mourinho vendosi ta largonte Viniciusin me pothuajse të gjithë pjesën e dytë për t’u luajtur dhe në vend të tij aktivizoi Yan Diomanden. 19-vjeçari u fut në lojë menjëherë pasi Real Madridi mbeti me dhjetë lojtarë dhe pati një paraqitje mjaft pozitive.
Statistikat e Viniciusit në “Metropolitano” e shpjegojnë pjesërisht vendimin e trajnerit. Braziliani nuk krijoi asnjë rast, regjistroi dy goditje jashtë portës, pati 22 ndërhyrje me topin, tentoi vetëm një driblim dhe kompletoi vetëm tetë pasime para se të largohej nga fusha.
Në anën tjetër, paraqitja e Diomandes e ka bërë edhe më të fortë konkurrencën në krahun e majtë. Ai luajti 36 minuta, kompletoi katër nga gjashtë driblime, pati saktësi prej 90 për qind në pasime dhe fitoi nëntë nga 12 duelet e tij. Paraqitja e tij erdhi pas një tjetër performance pozitive ndaj Elches, ku ai kishte dhënë edhe një asistim.
Kjo situatë ka hapur një dilemë të re për Mourinhon. Diomande po tregon se mund të jetë një alternativë serioze në krahun e majtë, ndërsa Viniciusi po kalon një periudhë larg nivelit të tij më të mirë. Megjithatë, sipas AS, zëvendësimi në derbi nuk nënkupton se Mourinho ka humbur besimin te braziliani, të cilin vazhdon ta konsiderojë një figurë qendrore të projektit të tij.
Debati ka kaluar edhe në televizionin spanjoll. Në El Chiringuito, Javi Balboa vuri në pikëpyetje reagimin dhe angazhimin e Viniciusit në disa momente, ndërsa Jorge D’Alessandro argumentoi se problemet e brazilianit duhet të shihen edhe në kontekstin e funksionimit kolektiv të Real Madridit dhe lëvizjeve të Mbappes drejt krahut të majtë.
Pikënisja e radhës do të jetë pas pushimit të kombëtareve, kur Real Madridi do të përgatitet për ndeshjen e radhës në La Liga ndaj Villarrealit.
Mourinho do të duhet të vendosë nëse do t’i besojë sërish Viniciusit nga minuta e parë apo do t’i japë më shumë hapësirë Diomandes pas paraqitjeve të tij të fundit.
