Londër, 12 tetor, Zhurnal.mk – Qeveria britanike ka propozuar një sërë ndryshimesh në Projektligjin për Imigracionin dhe Azilin, me synimin për të forcuar kontrollin mbi sistemin e emigracionit, për të parandaluar abuzimet ligjore dhe për të përshpejtuar largimin e personave që nuk kanë të drejtë të qëndrojnë në Mbretërinë e Bashkuar. Një nga ndryshimet lidhet me zbatimin e Nenit 8 të Konventës Evropiane për të Drejtat e Njeriut, i cili garanton respektimin e jetës private dhe familjare. Gjykatat do të duhet të marrin më shumë në konsideratë natyrën e marrëdhënieve familjare, përfshirë kohëzgjatjen dhe shpeshtësinë e kontakteve të një prindi me fëmijën e tij.
Qëllimi është të pengohen rastet kur emigrantët përpiqen të forcojnë pretendimet për qëndrim në Britani duke u rikthyer në banesën familjare pak kohë përpara paraqitjes së kërkesës. Po ashtu, autoritetet do të vlerësojnë kohën kur paraqiten provat dhe arsyet për vonesat, të cilat mund të ndikojnë në besueshmërinë e aplikantëve.
Masat mund të kenë ndikim edhe te emigrantët shqiptarë pa leje qëndrimi, veçanërisht ata që mbështeten te kërkesat për azil ose te lidhjet familjare për të kundërshtuar largimin nga Mbretëria e Bashkuar. Megjithatë, çdo rast do të vlerësohet sipas rrethanave konkrete dhe ndryshimet e propozuara nuk nënkuptojnë largimin automatik të çdo personi pa dokumente.
Reformat përfshijnë gjithashtu krijimin e një Autoriteti të Pavarur për Apelimet në Çështjet e Imigracionit (IIAA), i cili synon të mundësojë shqyrtimin më të shpejtë të ankesave dhe të kufizojë përdorimin e kërkesave të përsëritura për të vonuar procedurat e emigracionit. Një tjetër element i projektligjit lidhet me kostot e strehimit dhe mbështetjes financiare për azilkërkuesit. Sipas propozimit, personat që përfitojnë ndihmë të financuar nga taksapaguesit mund të detyrohen të kontribuojnë në këto shpenzime kur kanë mundësi financiare, përmes një sistemi pagesash të përcaktuara nga autoritetet.
