Shkup, 19 tetor Zhurnal.mk – “Kam dy vjet që jam jashtë Prokurorisë për Ndjekjen e Krimit të Organizuar dhe Korrupsionit dhe do të më duhet t’i shqyrtoj rrethanat, kapacitetet kadrovike dhe teknike. Jam i vetëdijshëm se duhet të forcohen kapacitetet e Qendrës Hetimore”, deklaroi prokurori Trajçe Pelivanov në emisionin “Top Tema” në televizionin Telma.
Pelivanovi, njëri nga katër kandidatët për drejtues të Prokurorisë për Ndjekjen e Krimit të Organizuar dhe Korrupsionit, theksoi se një nga idetë e tij kryesore është formimi i një sektori të posaçëm me ekspertë financiarë, të cilët do të ndihmonin në zhvillimin e hetimeve financiare.
“Idenë time e kam që të formohet një sektor me ekspertë financiarë, të cilët do të ndihmojnë në hetimet financiare, si dhe të bëhen përpjekje për sigurimin e mjeteve më të mëdha financiare. Gjithashtu, duhet të përmirësohet statusi material i prokurorëve dhe i të gjithë të punësuarve në këtë prokurori”, deklaroi Pelivanov.
Ai shtoi se është e nevojshme të bëhet një analizë serioze dhe e hollësishme e të gjitha lëndëve që janë aktualisht në procedurë, me qëllim përcaktimin e prioriteteve dhe identifikimin e rasteve që kërkojnë vëmendje më të madhe.
“Duhet të përcaktohen prioritetet dhe të vendoset se cilave lëndë duhet t’u kushtohet më shumë vëmendje, si dhe të ndihmohet zgjidhja e tyre, veçanërisht e atyre që zgjojnë interes më të madh në opinion”, theksoi Pelivanov.
