Një krijues përmbajtjesh nga Pensilvania ka realizuar një pastrim jashtëzakonisht të kënaqshëm të një Ford Mustang klasik të vitit 1965, duke hequr ndryshkun nga karroceria e tij me një proces që ka tërhequr vëmendjen e mijëra përdoruesve në internet.
Fillimisht, vetura u zhyt në një enë me acid, ndërsa më pas u nxor dhe u pastrua me presion të lartë të ujit, derisa ndryshku filloi të largohej dhe ngjyra origjinale e karrocerisë të bëhej sërish e dukshme.
Autori i videos është Trevor Malloy, i cili në Instagram njihet me emrin minute_of_dangle. Ai është profesionist në heqjen e bojës dhe në profilin e tij publikon vazhdimisht pamje të proceseve të largimit të ndryshkut. Përmbajtja e tij ka mbledhur më shumë se 476 mijë ndjekës.
Pastrimi i Mustangut të vitit 1965 ishte veçanërisht mbresëlënës, pasi në fund të procesit pothuajse nuk kishte mbetur asnjë gjurmë ndryshku në pjesën e çeliktë të karrocerisë.
Megjithatë, pavarësisht pamjes së përmirësuar, vetura ishte ende larg të qenit e gatshme për të lëvizur në rrugë, pasi pastrimi kishte zbuluar kryesisht karrocerinë metalike, ndërsa shumë pjesë të tjera mungonin.
Videoja mori reagime të shumta pozitive. Një përdorues komentoi: “E hapa videon për shkak të enës me acid, por qëndrova për larjen me presion”.
Një tjetër e cilësoi si “gjënë më të kënaqshme që kam parë gjatë muajve të fundit”.
Edhe llogaria zyrtare e Ford Mustang në Instagram reagoi ndaj videos, duke komentuar me humor: “Faleminderit për banjën”.
Pamjet dëshmojnë edhe një herë se videot e pastrimit dhe restaurimit të veturave të vjetra vazhdojnë të jenë ndër përmbajtjet më të pëlqyera në rrjetet sociale.
