Sejko-FMN: Ekonomia shqiptare ruan qëndrueshmërinë, perspektivë pozitive për vendin

Nga D V
A+ A-
Rivendos

Tiranë, 20 nëntor, Zhurnal.mk – Ekonomia vijon të tregojë qëndrueshmëri, ndërsa ruajtja e stabilitetit makroekonomik dhe financiar mbetet thelbësore për vijimin e rritjes së qëndrueshme.

Ky ishte një nga mesazhet kryesore të takimit përmbyllës që Guvernatori i Bankës së Shqipërisë, Gent Sejko, zhvilloi me misionin e Fondit Monetar Ndërkombëtar (FMN), të kryesuar nga Diego Cerdeiro, Shef i Misionit për Shqipërinë.

Misioni i FMN-së qëndroi në Tiranë në datat 2–20 nëntor 2026, ku zhvilloi takime me përfaqësues të Bankës së Shqipërisë dhe drejtues të lartë të institucionit. Diskutimet u përqendruan te zhvillimet më të fundit ekonomike, inflacioni, kursi i këmbimit, sistemi bankar dhe perspektiva e ekonomisë shqiptare, si dhe te procesi i vlerësimit të sektorit financiar, në kuadër të programit të përbashkët të FMN-së dhe Bankës Botërore (FSAP).

Guvernatori Sejko u shpreh se “konsumi, investimet dhe aktiviteti i shërbimeve vijojnë të mbështesin rritjen ekonomike, ndërsa theksoi se ruajtja e këtij ritmi në afatin e gjatë kërkon rritjen e produktivitetit, forcimin e konkurrueshmërisë së bizneseve dhe vijimin e reformave strukturore, duke shfrytëzuar edhe mundësitë që ofron procesi i integrimit evropian”.

Përfaqësuesit e misionit të FMN-së theksuan se perspektiva ekonomike e vendit mbetet e favorshme, ndërsa pasiguritë në mjedisin ndërkombëtar kërkojnë politika të kujdesshme dhe forcim të kapaciteteve të ekonomisë për të përballuar goditje të mundshme.

Misioni i FMN-së vuri në dukje se kalimi gradual drejt një qëndrimi neutral të politikës monetare ishte i përshtatshëm, duke pasur parasysh pozicionin ciklik të ekonomisë.

Një vend të rëndësishëm në takim zuri ecuria e sistemit bankar. Guvernatori Sejko u shpreh se sektori mbetet i mirëkapitalizuar dhe likuid, duke krijuar kushte për mbështetjen e mëtejshme të bizneseve dhe familjeve me financim. Ai theksoi se premisat për vijimin e kreditimit mbeten pozitive, por kjo rritje duhet të ecë paralelisht me ruajtjen e cilësisë së portofolit dhe me vlerësimin e kujdesshëm të aftësisë paguese të kredimarrësve.

Përfaqësuesit e FMN-së vlerësuan rëndësinë e një sektori bankar të shëndetshëm për zhvillimin e ekonomisë dhe theksuan nevojën për monitorimin e vazhdueshëm të rreziqeve që shoqërojnë zgjerimin e kredisë. Në këtë drejtim, u diskutua mbi rolin e mbikëqyrjes dhe të masave makroprudenciale në zbutjen e dobësive financiare dhe në forcimin e qëndrueshmërisë së sektorit. Ata mirëpritën ndryshimet e fundit në instrumentet e politikës makroprudenciale, të cilat, të kombinuara me masat e bazuara te huamarrësit, forcojnë rezistencën e përgjithshme të sistemit financiar.

Në vijim, palët u ndalën te procesi i vlerësimit FSAP dhe kontributi i tij në identifikimin e prioriteteve për zhvillimin e mëtejshëm të sistemit financiar. Guvernatori Sejko e cilësoi këtë proces si një mundësi të rëndësishme për të vlerësuar përparimin e bërë dhe për të orientuar reformat e ardhshme. Misioni i FMN-së vlerësoi bashkëpunimin me Bankën e Shqipërisë, profesionalizmin e stafit dhe angazhimin e fortë të institucionit në mbështetje të këtij vlerësimi.

Misioni i FMN-së përshëndeti gjithashtu miratimin e ligjit të ri “Për Bankën e Shqipërisë”, duke e vlerësuar si një hap të rëndësishëm drejt forcimit të pavarësisë institucionale. Përfaqësuesit e misionit theksuan se ky ligj forcon bazën ligjore për përmbushjen e mandatit të bankës qendrore dhe rrit aftësinë e saj për t’iu përgjigjur sfidave ekonomike e financiare të vendit.

Në përfundim, Guvernatori falënderoi misionin për diskutimet dhe bashkëpunimin e vazhdueshëm. Ai rikonfirmoi angazhimin e Bankës së Shqipërisë për të ruajtur stabilitetin e çmimeve dhe atë financiar, si kushte thelbësore për një zhvillim të qëndrueshëm ekonomik dhe për rritjen e mirëqenies së qytetarëve.

artikuj të ndërlidhura

Kjo faqe interneti përdor cookies për të përmirësuar përvojën tuaj. Ne do të supozojmë se jeni dakord me këtë, por mund të çregjistroheni nëse dëshironi. Pranoj Lexo më tepër