Gostivar, 6 shkurt – Ambasadori i Republikës së Italisë në Maqedoninë e Veriut, Paolo Palminteri, sot ishte për vizitë në komunën Gostivar dhe u takua me kryetarin Valbon Limani.
Në takim ambasadori Palminteri e konfirmoi mbështetjen e vazhdueshme të shtetit italian për Maqedoninë e Veriut dhe ishte potencuar fuqizimi i bashkëpunimit me komunën Gostivar. Ambasadori shfaqi interesim për kontribut në procesin e arsimit dhe përfshirjen e gjuhës italiane në shkollat në vend, si urë e lidhjes mes dy shteteve.
Palminteri theksoi se roli i mërgimtarëve të cilët jetojnë dhe punojnë në Itali është i rëndësishëm dhe se ata u bënë pjesë e rëndësishme e shoqërisë italiane dhe japin kontribut të madh në ekonomi, sport dhe kulturë.
Nikoqiri i takimit, kryetari Valbon Limani shprehu falënderim për vizitën dhe mbështetjen nga Italia. Në bisedë, ai e informoi ambasadorin për ngjarjet aktuale në komunë, funksionimin e administratës pas zgjedhjeve të fundit lokale dhe për sfidat me të cilat përballet vetëqeverisja lokale.
Pas takimit të dy vlerësuan se ky është hap i rëndësishëm drejt thellimit të bashkëpunimit ndërinstitucional dhe fuqizim i marrëdhënieve miqësore mes të dyja vendeve.
