Zagreb, 25 janar – Ambasadori i Izraelit në Kroaci, Geri Koren, në një intervistë për mediat kroate ka folur për Iranin, kërcënimet e sigurisë në Lindjen e Mesme, luftën në Gaza, rritjen e antisemitizmit në Evropë, rolin e SHBA-së dhe marrëdhëniet midis Izraelit dhe Kroacisë.
Për pyetjen nëse jemi në prag të një eskalimi të ri në Lindjen e Mesme dhe një mundësi sulmi të SHBA-së ndaj Iranit, Koren ka thënë se Izraeli nuk kërkon eskalim, por duhet të jetë i përgatitur për çdo skenar. Ai shtoi se bashkëpunimi i ngushtë mes Izraelit dhe SHBA-ve është në vazhdim, duke theksuar se komandanti i Komandës Qendrore të SHBA-ve aktualisht është në Izrael.
“Po mendoj se do të dimë më shumë pasi të vendosin amerikanët. Ata janë të pavarur dhe mund të vendosin çfarë duan, pavarësisht nëse do të jetë një sulm ndaj regjimit apo vetëm një masë kundërpërgjigje,” tha ai.
Duke folur për Iranin, ai e cilësoi atë si një kombinim të disa problemeve serioze, përfshirë shtypjen ndaj popullit të vet dhe zhvillimin e një programi bërthamor dhe raketor.
“Irani është i njohur për brutalitetin ndaj popullit të tij. Dje, ‘Time’ publikoi shifrat që flasin për 30,000 të vrarë. Edhe nëse flitet për 5,000 ose 10,000 njerëz, kjo gjithsesi tregon brutalitetin e regjimit që ka vrarë kaq shumë qytetarë të tij,” tha ai.
Ai theksoi se programi bërthamor i Iranit, së bashku me zhvillimin e raketave balistike, paraqet një kërcënim jo vetëm për Lindjen e Mesme, por edhe për Evropën. “Po flasim për raketa që mund të arrijnë deri në Evropën Jugore, dhe disa pretendojnë se mund të arrijnë deri në Vjenë. Ky është një mënyrë që regjimi përpiqet të mbijetojë,” është i sigurt Koren.
“Po flitet për sasi të rreth 400 kilogramëve, që është shumë më tepër se sa është e nevojshme për një bombë bërthamore. Irani ka pasur mundësinë ta raportonte këtë në Agjencinë Ndërkombëtare të Energjisë Atomike, por nuk e ka bërë këtë,” shtoi ai.
Ai theksoi se Irani vazhdon të destabilizojë rajonin dhe të kërcënojë fqinjët e tij, si dhe të realizojë aktivitete terroriste në mbarë botën.
“Këto aktivitete kanë një ndikim global, duke përfshirë Evropën, Amerikën Veriore dhe Jugore. Diçka po ndodh tani në Amerikën Latine, në Venezuelë dhe disa shtete të tjera, ku janë të pranishëm agjentë të Iranit dhe Hezbollahut,” tha ambasadori.
Ai beson se Shtetet e Bashkuara të Amerikës kanë arsye të forta për t’u përballur me regjimin iranian.
