Shkup, 15 qershor Zhurnal.mk – Policia ka arrestuar personin e dyshuar për zjarrvënien ndaj automjetit diplomatik të Ambasadës së Bullgarisë në Shkup, konfirmojnë burime nga Ministria e Punëve të Brendshme për TV24. Sipas informacioneve, i dyshuari e ka pranuar veprën, ndërsa tek ai janë gjetur edhe prova shtesë që lidhen me aktin vandal.
Nga pamjet e publikuara nga agjencia bullgare BGNES, bëhet fjalë për një burrë të moshës së mesme, i cili nxjerr një shishe me lëndë djegëse, spërkat njërin automjet dhe më pas i vë flakën edhe automjetit tjetër.
MPB-ja njoftoi se bëhet fjalë për I.D. (44) nga Shkupi, i cili është privuar nga liria dhe po mbahet në stacion policor. Gjatë veprimeve hetimore është gjetur edhe veshja që ai kishte veshur në momentin e kryerjes së veprës. Në koordinim me prokurorin kompetent po ndërmerren masa për zbardhjen e plotë të rastit, pas së cilës ndaj tij do të ngrihet kallëzim penal përkatës.
Qeveria e Maqedonisë së Veriut e dënoi incidentin, duke theksuar se ngjarje të tilla nuk kanë vend në një shtet demokratik.
“Nëpërmjet institucioneve kompetente po ndërmerren masa intensive për zbardhjen e plotë të rastit dhe identifikimin e përgjegjësve. Çdo përpjekje për nxitjen e tensioneve, përhapjen e urrejtjes apo cenimin e sigurisë do të sanksionohet maksimalisht. Shteti ka kapacitet dhe do të përgjigjet me forcën e plotë të institucioneve, pa lejuar që individë të dëmtojnë reputacionin e Maqedonisë”, thuhet në reagimin e Qeverisë.
Reagim i ashpër erdhi edhe nga Sofja zyrtare. Ministria e Punëve të Jashtme e Bullgarisë vlerësoi se incidenti është pasojë e retorikës agresive politike dhe gjuhës së urrejtjes ndaj bullgarëve në Maqedoninë e Veriut.
“Djegia e dy automjeteve të Ambasadës Bullgare në Shkup është rezultat i gjuhës së urrejtjes, nxitjes së tensioneve dhe mungesës së reagimit adekuat institucional në raste të ngjashme të mëparshme, gjë që krijon ndjenjë mosndëshkueshmërie për autorët”, thuhet në reagimin e MPJ-së bullgare.
Në deklaratë përmendet edhe rasti i sulmit ndaj klubit kulturor bullgar në Manastir, duke theksuar se autori i atij sulmi nuk mori dënimin e duhur dhe më pas u përfshi në një fushatë politike parazgjedhore.
Bullgaria njoftoi se do të vazhdojë të përdorë të gjithë mekanizmat në dispozicion për të kundërshtuar çdo përpjekje për krijimin e atmosferës së frikës ndaj bullgarëve në Maqedoninë e Veriut.
Ky është incidenti i dytë para Ambasadës Bullgare gjatë këtij viti. Në janar u thyen xhamat e objektit diplomatik, ndërsa autori i atij rasti u arrestua menjëherë.
