Shkup, 16 tetor, Zhurnal.mk – Mundësitë për investime të reja në energjetikë, ruajtjen e energjisë elektrike dhe modernizimin e infrastrukturës së rrjetit kanë qenë në fokus të takimit mes ministres së energjetikës, Sanja Bozhinovska, dhe delegacionit të Bankës Evropiane për Rindërtim dhe Zhvillim (BERZH), e cila qëndron në vend.
Bisedimet kanë qenë të orientuara drejt shfrytëzimit më të madh të burimeve të ripërtëritshme të energjisë dhe krijimit të kushteve për lidhjen e kapaciteteve të reja prodhuese. Në këtë drejtim, është theksuar nevoja për forcimin e rrjetit të transmetimit të energjisë elektrike, në koordinim me MEPSO, si dhe për zhvillimin e sistemeve për ruajtjen e energjisë së prodhuar.
Bozhinovska ka theksuar se interesi për përdorimin e burimeve të ripërtëritshme është gjithnjë e më i madh te qytetarët dhe kompanitë, për çka Ministria do të vazhdojë të punojë në krijimin e kushteve për përdorimin e tyre më të gjerë. Në takim është biseduar edhe për investime të reja përmes partneriteteve publike-private, si dhe për zgjidhjet ligjore që duhet të nxisin zhvillimin e sektorit energjetik.
Ndër temat kanë qenë edhe lëndët e para minerale kritike, futja e sistemeve të matjes inteligjente dhe aktet nënligjore të lidhura me mekanizmat për kontrata për diferencë në çmim (CfD) për energjinë elektrike nga burimet e ripërtëritshme.
Vëmendje e veçantë i është kushtuar lidhjes energjetike rajonale. Bozhinovska e ka informuar delegacionin për përparimin në lidhjen me Greqinë dhe Serbinë, si dhe për planet për zhvillimin e lidhjeve shtesë të rrjetit me vendet e rajonit. Në bisedime është hapur edhe tema e sigurisë kibernetike si kusht i rëndësishëm për funksionimin e sigurt të sistemit energjetik.
Në delegacionin e BERZH kanë qenë drejtori për Holandën, Kinën, Maqedoninë e Veriut, Armeninë dhe Mongolinë, Rene van Hel, përfaqësuesi i bankës në vend, Fatih Turkmenoglu, si dhe drejtorë përgjegjës për rajone të tjera.
Nga Ministria informojnë se në takim janë prezantuar zgjidhjet ligjore aktuale dhe aktivitetet reformuese të orientuara drejt forcimit të sistemit energjetik vendor dhe modernizimit të infrastrukturës. Përfaqësuesit e BERZH kanë përshëndetur përpjekjet për krijimin e një sistemi energjetik stabil dhe të parashikueshëm.
Bozhinovska ka konfirmuar përkushtimin e Ministrisë për bashkëpunimin me BERZH, me qëllim zbatimin e reformave, rritjen e sigurisë energjetike dhe krijimin e kushteve për zhvillim afatgjatë të sektorit.
