Çfarë po ndodh në BDI? Kush e nxit Sefer Selimin të shkruajë kundër Artan Grubit?

Nga D V
A+ A-
Rivendos

Shkup, 18 nëntor, Zhurnal.mk – Sefer Selimi thekson se shqiptarët nuk merren me problemet e Grubit dhe se ai nuk mund ta diktojë më politikën shqiptare në Maqedoninë e Veriut përmes përçarjes së BDI-së. Ai i referohet edhe periudhës kur BDI-ja ishte në pushtet, duke e kritikuar Grubin se, sipas tij, në vend që të merrej me problemet e shqiptarëve, merrej me çështje të tjera, shkruan Plusinfo, transmeton Zhurnal.

Tensionet dhe përplasjet e brendshme në BDI gjithnjë e më shpesh po dalin edhe në publik. Kësaj radhe, debati u zhvendos në rrjetet sociale, ku analisti Sefer Selimi kritikoi publikisht Artan Grubin, pas së cilës reagoi Artin Spahiu, bashkëpunëtor i afërt i ish-zëvendëskryeministrit të parë.

Selimi, i cili prej vitesh njihet për qëndrimet e tij në mbështetje të politikave të BDI-së dhe afërsinë me nënkryetarin aktual të partisë, Bujar Osmanin, deklaroi se problemet e Artan Grubit me organet e drejtësisë janë probleme të tij personale dhe se nuk duhet të paraqiten si probleme të shqiptarëve.

Në statusin e tij, Selimi thekson se shqiptarët nuk merren me problemet e Grubit dhe se ai nuk mund ta diktojë më politikën shqiptare në Maqedoninë e Veriut përmes përçarjes së BDI-së. Ai i referohet edhe periudhës kur BDI-ja ishte në pushtet, duke e kritikuar Grubin se, sipas tij, në vend që të merrej me problemet e shqiptarëve, merrej me çështje të tjera.

Ky qëndrim i Selimit vjen në një periudhë kur në BDI gjithnjë e më shpesh spekulohet për përplasje brendapartiake rreth ndikimit dhe drejtimit të partisë. Njëkohësisht, afërsia e tij me Bujar Osmanin hap hapësirë që kjo deklaratë të interpretohet edhe përmes prizmit të marrëdhënieve mes Osmanit dhe Grubit.

Ndaj statusit të Selimit reagoi Artin Spahiu, i cili e akuzoi analistin se kishte rënë në kurthin e, siç i quan ai, shpifjeve dhe konstrukteve politike të drejtuara kundër Artan Grubit. Spahiu pretendon se një pjesë e njerëzve në BDI, në bashkëpunim me VLEN-in, po përpiqen ta paraqesin Grubin si fajtor për përçarjen e mundshme të partisë.

Në reagimin e tij, Spahiu drejtoi akuza edhe ndaj figurave të tjera në BDI, duke pretenduar se pikërisht fraksionet, largimet dhe interesat personale të individëve të caktuar e kanë dëmtuar partinë. Ai doli në mbrojtje të Grubit, duke vlerësuar se edhe nga pozicioni i tij aktual, ai punon për BDI-në më shumë sesa një pjesë e mirë e udhëheqjes aktuale të partisë.

Spahiu shkon edhe një hap më tej, duke akuzuar një pjesë të drejtuesve partiakë se shqetësimi i tyre i vërtetë nuk është përçarja e BDI-së, por ruajtja e pozicioneve dhe ndikimit të tyre në parti. Sipas tij, Grubi paraqitet si „kurban” për të fshehur përgjegjësitë e të tjerëve.

Përplasja mes këtyre dy qëndrimeve nxjerr në sipërfaqe një ndarje të mundshme brenda BDI-së. Nga njëra anë janë ata që angazhohen për distancim nga Artan Grubi, ndërsa nga ana tjetër janë njerëzit që vazhdojnë ta mbrojnë publikisht.

Në prapavijën e këtij debati përmendet edhe rivaliteti i mundshëm mes Artan Grubit dhe Bujar Osmanit, dy figura që kanë pasur ndikim të konsiderueshëm në BDI.

Një gjë është e qartë debati se kush e ka dobësuar BDI-në, kush po përpiqet ta përçajë dhe kush duhet të mbajë përgjegjësi për gjendjen aktuale në parti po bëhet gjithnjë e më i hapur, ndërsa përplasjet mes njerëzve të afërt me dy figurat politike kërcënojnë t’i thellojnë edhe më tej ndarjet në parti.

 

artikuj të ndërlidhura

Kjo faqe interneti përdor cookies për të përmirësuar përvojën tuaj. Ne do të supozojmë se jeni dakord me këtë, por mund të çregjistroheni nëse dëshironi. Pranoj Lexo më tepër