Uashington 21 shtator Zhurnal.mk – Anëtarja e Presidencës së Bosnjë e Hercegovinës, Zhelka Cvijanoviq, njoftoi në rrjetet sociale se në Shtëpinë e Bardhë është takuar me shefen e kabinetit të presidentit të Shteteve të Bashkuara, Donald Trump, me të cilën ka biseduar për situatën në Bosnje dhe rajon, raporton Radio Evropa e Lirë.
“Ishte kënaqësi të bisedoja sot në Shtëpinë e Bardhë me Susie Wiles, shefen e stafit dhe bashkëpunëtoren më të afërt të presidentit amerikan Donald Trump, për situatën në Bosnjë e Hercegovinë dhe rajon. Po ndërtojmë miqësi të reja dhe po forcojmë ato të vjetrat. Presim me kënaqësi vazhdimin e bashkëpunimit”, shkroi Cvijanoviq në rrjetet sociale.
Qeveria e entitetit Republika Sërpska gjatë dhjetë vjetëve të fundit ka angazhuar gjithsej 15 kompani amerikane lobimi dhe firma avokatie, përfshirë edhe përfaqësinë e saj të regjistruar për të njëjtat aktivitete.
Të gjitha kompanitë e lobimit dhe firmat e avokatisë të angazhuara nga qeveria e entitetit të Republikës Sërpska në Bosnjë e Hercegovinë janë të lidhura me qarqet politike republikane në Uashington.
Susie Wiles është një stratege republikane, me bazë në Florida, e cila drejtoi fushatat e Trumpit në këtë shtet në vitet 2016 dhe 2020, si dhe fushatën e suksesshme të Ron DeSantisit për guvernator të Floridës në vitin 2018.
Para kësaj, ajo drejtoi fushatën e Rick Scottit për guvernator të Floridës në vitin 2010 dhe për një kohë të shkurtër shërbeu si menaxhere e fushatës presidenciale të ish-guvernatorit të Jutas, Jon Huntsman, në vitin 2012.
Wiles gjithashtu ka punuar në kabinetet e ish-kryetarëve të Xheksonvillit, John Delaney dhe John Peyton.
Ndryshe, Cvijanoviq së bashku me ish-presidentit e entitetit të Republikës Sërpska u larguan nga lista e sanksioneve amerikane në tetor të vitit 2025, së bashku me 48 anëtarë të familjes së Dodikut, kompanitë e tyre dhe bashkëpunëtorët e afërt.
Megjithatë, Dodik dhe Cvijanoviq mbeten nën sanksionet e Mbretërisë së Bashkuar.
