Zgjedhja e veshjes së Melania Trump për takimin me presidentin kinez Xi Jinping ka ngjallur reagime të shumta në rrjetet sociale. Zonja e Parë e SHBA-së zgjodhi një kombinim bardhezi për vizitën në Shtëpinë e Bardhë të enjten, ndërsa ajo që tërhoqi më së shumti vëmendjen ishte fakti se u shfaq e veshur me pantallona.
Xi Jinping, 73 vjeç, dhe delegacioni i tij mbërritën në Shtetet e Bashkuara për një takim me presidentin amerikan Donald Trump, 80 vjeç. Vizita erdhi pas qëndrimit të Trumpit në Kinë në fillim të këtij viti.
Disa përdorues të rrjeteve sociale e konsideruan zgjedhjen e Melanias si të papërshtatshme për një takim të tillë zyrtar. Vëmendjen më të madhe e mori bluza e bardhë me një fjongo të madhe, të cilën ajo e kishte kombinuar me pantallona të zeza me prerje të gjerë.
“Duket si kameriere… A nuk do të ishte një fustan më i përshtatshëm? Apo ky është një lloj proteste?”, shkroi një përdorues.
Një tjetër kritikoi stilin e saj, duke shkruar në rrjetin X se Melania “ka nevojë për një stilist të ri”, ndërsa veshjen e saj e përshkroi si shumë pak formale për një rast të tillë.
Foto: Profimedia
Edhe përdorues të tjerë e konsideruan kombinimin shumë të thjeshtë për një takim diplomatik të nivelit të lartë. “Kjo veshje është shumë e zakonshme për këtë rast. Ajo zakonisht duket e përsosur, por këtë herë nuk funksionon”, ishte një nga komentet.
Megjithatë, pavarësisht kritikave për stilin e saj, bëhet fjalë për një kombinim mjaft të kushtueshëm. Bluza e markës Saint Laurent kushton rreth 2,300 dollarë, ndërsa pantallonat e zeza me bel të lartë nga Dolce & Gabbana kanë një çmim prej rreth 1,945 dollarësh.
Pamjen e saj Melania e kompletoi me grimin karakteristik, me theks te sytë dhe shkëlqim në buzë, ndërsa flokët i kishte të mbledhura larg fytyrës. Ajo kishte zgjedhur gjithashtu këpucë të zeza me majë të theksuar dhe vathë diamanti.
Stilistja dhe këshilltarja e imazhit të Melanias, Cynthia Kennedy, kishte shpjeguar më herët për Daily Mail se zgjedhjet e saj në modë synojnë të pasqyrojnë pavarësinë dhe gatishmërinë për t’u distancuar nga pritshmëritë tradicionale.
Foto: Profimedia
“Ajo nuk bën atë që njerëzit presin. Nuk vesh modën e sigurt, të mërzitshme dhe tradicionale të një zonje të parë”, kishte deklaruar Kennedy.
Sipas saj, Melania zgjedh veshje nga stilistë që i pëlqen, kryesisht marka luksoze evropiane si Dolce & Gabbana.
“Ajo vesh atë që dëshiron dhe e bën të qartë se këtë rol e ushtron sipas kushteve të veta. Ajo që bën mund të mos jetë domosdoshmërisht moderne, por është strategjike”, kishte thënë Kennedy.
Ajo shtoi se përmes zgjedhjeve të saj, Melania tregon se “luan sipas rregullave krejtësisht të ndryshme” dhe se nuk është e interesuar të vishet për t’iu përshtatur një roli të caktuar.
