Shkup, 4 shkurt – Kryeparlamentari Afrim Gashi, gjatë vizitës së tij në Uashington, SHBA, realizoi takime të rëndësishme me drejtues të dy instituteve prestigjioze amerikane – Institutit Kombëtar për Demokraci (NDI) dhe Institutit Ndërkombëtar Republikan (IRI).
Në takimin me znj. Tamara Wittes, Kryetare e NDI-së, dhe z. Scott Bates, Drejtor Rajonal për Europën dhe Azinë, u adresua bashkëpunimi afatgjatë ndërmjet Kuvendit dhe NDI-së. U diskutuan projektet e rëndësishme, përfshirë Programin për Mbështetje Parlamentare, i cili prej vitesh ka dhënë rezultate konkrete në forcimin e rolit dhe pavarësisë së Kuvendit, rritjen e transparencës, digjitalizimin dhe afrimin e institucionit me qytetarët.
“Vlerat që promovon NDI janë thelbësore për forcimin e demokracisë institucionale dhe dialogut politik. Shpreh mirënjohje dhe gatishmëri për vazhdimin e këtij partneriteti në shërbim të përfaqësimit më të mirë të qytetarëve”, tha Gashi
Në kuadër të vizitës, kryeparlamentari zhvilloi takim edhe me z. Daniel Twining, Kryetar i IRI-së, dhe z. Stephen Nix, Drejtor Rajonal për Europën dhe Euroazinë. Diskutimet u fokusuan në mundësitë e bashkëpunimit dhe rëndësinë e dialogut strategjik ndërmjet Maqedonisë së Veriut dhe Shteteve të Bashkuara. Gashi vlerësoi mbështetjen e vazhdueshme të IRI-it për forcimin e kapaciteteve parlamentare dhe standardeve demokratike. “Kontributi i IRI-it në zhvillimin e kulturës politike përmes programeve të ndryshme është i çmuar. Ky partneritet ka rol të rëndësishëm në zhvillimin institucional dhe bashkëpunimin ndërkombëtar”, tha Gashi.
