Prokuroria e Posaçme kundër Korrupsionit dhe Krimit të Organizuar vendosi sot deklarimin fajtor të të pandehurit Irakli Leka, ish-shef i regjimit të brendshëm në burgun e Lushnjës, për kryerjen e veprës penale “Korrupsioni pasiv i personave që ushtrojnë funksione publike”.
Sipas njoftimit për shtyp të GJKKO, trupi gjykues i përbërë nga gjyqtaret Flojera Davidhi, Atalanta Zeqiraj dhe Marinela Osmani vendosi dënimin e tij me 3 vite e 3 muaj burgim, por në aplikim të nenit 406/1 të Kodit të Procedurës Penale, të pandehurit Irakli Leka iu zbrit 1/3 e masës së dënimit me burgim, duke u dënuar përfundimisht me 2 vite e 2 muaj burgim.
Në zbatim të nenit 59 të Kodit Penal GJKKO vendosi pezullimin e ekzekutimit të dënimit me burgim, duke e vënë në provë të pandehurin Irakli Leka për një periudhë kohore 2 vite dhe gjatë kësaj kohe i pandehuri detyrohet të mbajë kontakte me Drejtorinë e Shërbimit të Provës që mbulon vendbanimin e tij.
GJKKO sqaron se duke qenë se dënimi me burgim u pezullua me kusht, konstatohet shuarja e masës së sigurimit “arrest në shtëpi” ndaj të pandehurit Irakli
Leka.
Gjithashtu Lekës i hiqet e drejta për të ushtruar funksione publike për një periudhë kohore prej 5 (pesë) vjet.
Rasti i Lekajt u publikua në një emision investigativ teksa u filmua duke marrë 700 euro në këmbim të një leje 5 ditore për një të dënuar në burgun e Lushnjës.
