Shkup/Bratisllavë, 07 maj, Zhurnal.mk – Maqedonia e Veriut dhe Sllovakia kanë potencial të madh për avancimin e bashkëpunimit ekonomik, ndërsa Bratisllava mbetet një mbështetëse e fuqishme e integrimit evropian të vendit dhe e reformave që lidhen me procesin eurointegrues.
Kjo u konstatua në takimin kokë më kokë mes ministres së Financave, Gordana Dimitrieska-Koçoska, dhe homologut të saj sllovak, Ladislav Kamenicky, i cili ishte nikoqir i takimit.
Në takim u theksua se Sllovakia është e gatshme të transferojë përvojat dhe njohuritë e saj në Maqedoninë e Veriut, veçanërisht në fusha ku konsiderohet më e avancuar dhe që janë me rëndësi për përmbushjen e kritereve të nevojshme për anëtarësim në Bashkimi Evropian.
Sipas njoftimit, mbështetja dhe transferimi i “know-how”-it pritet të përfshijë financat publike, luftën kundër evazionit tatimor dhe menaxhimin e investimeve publike.
Në takim u potencua gjithashtu mbështetja e fuqishme e Sllovakisë për zbatimin e Strategjisë nacionale zhvillimore, e cila konsiderohet dokument kyç për përcaktimin e politikave të ardhshme zhvillimore të vendit.
Ministrja Gordana Dimitrieska-Koçoska theksoi se Qeveria dhe Ministria e Financave mbeten të fokusuara në ruajtjen e stabilitetit makroekonomik dhe të financave publike, si dhe në zbatimin e konsolidimit gradual fiskal dhe arritjen e normave më të larta të rritjes ekonomike.
“Bëhet fjalë për reforma dhe hapa që janë prioritet në programet qeveritare, por edhe në masat dhe politikat për të cilat u diskutua në takimet e djeshme në Bruksel”, theksoi ministrja.
Bashkëbiseduesit vlerësuan se bashkëpunimi ekonomik ndërmjet dy vendeve duhet të avancohet më tej, duke theksuar nevojën për thellimin e lidhjeve të biznesit, shkëmbimin e informacioneve dhe realizimin e projekteve të përbashkëta.
