Ka përfunduar votimi për zgjedhjen e shefit të ri të Prokurorisë për Krim dhe Korrupsion

Nga I.A
A+ A-
Rivendos

Shkup, 28 tetor, Zhurnal.mk – Ka përfunduar votimi për zgjedhjen e shefit të ri të Prokurorisë Themelore Publike për Ndjekjen e Krimit të Organizuar dhe Korrupsionit, ku 187 prokurorë publikë kanë pasur të drejtë vote. Në garë për këtë pozitë janë pesë kandidatë: Faton Azizi, Trajçe Pelivanov, Lidija Raiçeviq, Iskra Haxhi Vasileva dhe Jovan Cvetanovski. Votimi u zhvillua drejtpërdrejt dhe në mënyrë të fshehtë, në Prokurorinë Publike të Republikës dhe në katër prokuroritë e larta në Shkup, Gostivar, Shtip dhe Manastir.

Të drejtën e votës e ushtroi edhe prokurori publik i shtetit, Nenad Saveski, i cili e vlerësoi procesin si të rëndësishëm dhe demokratik, duke theksuar se të pesë kandidatët janë profesionistë të dëshmuar dhe se cili do nga ata të zgjidhet, nuk do të jetë zgjedhje e gabuar.

“Shpresoj që i zgjedhuri të jetë prokuror publik që do t’u përgjigjet me përkushtim detyrave që e presin dhe se së bashku do të kontribuojmë, para së gjithash, në forcimin e besimit dhe në dëshmimin e qartë të luftës kundër krimit të organizuar dhe korrupsionit.”, – theksoi kryeprokurori, Nenad Saveski.

Pas grumbullimit dhe numërimit të votave nga njësitë e lartpërmendura zgjedhore do të shpallen rezultatet ku do të dihet se kush do ta drejtojë Prokurorinë për Ndjekjen e Krimit të Organizuar dhe Korrupsionit. Procedura e zgjedhjes së prokurorit të ri zhvillohet për shkak të përfundimit të mandatit të shefit aktual, Islam Abazi.

artikuj të ndërlidhura

Kjo faqe interneti përdor cookies për të përmirësuar përvojën tuaj. Ne do të supozojmë se jeni dakord me këtë, por mund të çregjistroheni nëse dëshironi. Pranoj Lexo më tepër