Riga, 25 shtator, Zhurnal.mk – Katër avionë luftarakë gjermanë “Eurofighter” kanë mbërritur në Letoni për të garantuar sigurinë e hapësirës ajrore të vendit gjatë zgjedhjeve parlamentare që do të zhvillohen në fillim të muajit të ardhshëm.
Avionët, të cilët i përkasin skuadriljes 74 të Forcave Ajrore Taktike të Bundeswehr-it, me bazë në Neuburg an der Donau, u ulën në aeroportin ushtarak të Lielvardes, në Letoni.
Sipas një deklarate të Ministrisë së Mbrojtjes, avionët do të qëndrojnë në vend për pak më shumë se një javë dhe do të kryejnë detyra në mbështetje të sistemit të integruar të NATO-s për mbrojtjen ajrore dhe kundër raketave.
Letonia do të zgjedhë parlamentin e ri më 3 tetor.
Në sfondin e shkeljeve të përsëritura të hapësirës ajrore të vendeve baltike, shteti anëtar i NATO-s u ka kërkuar aleatëve mbështetje për të garantuar zhvillimin e sigurt të zgjedhjeve parlamentare.
Forcat Ajrore Gjermane kishin konfirmuar dislokimin e “Eurofighter”- ëve javën e kaluar, përpara rifillimit të misionit të mbikëqyrjes së hapësirës ajrore të NATO-s nga Estonia, që do të zgjasë për një periudhë më të gjatë duke nisur nga dhjetori 2026.
