Tiranë, 28 shtator, Zhurnal.mk – Këshilli i Sigurisë Kombëtare do të mblidhet sot në orën 08:30 në Pallatin e Brigadave, me thirrjen e Presidentit Bajram Begaj.
Mbledhja zhvillohet pas nisjes së procedimit penal ndaj ish-drejtoreshës së Shërbimit Informativ Shtetëror (SHISH), Vlora Hyseni, e dyshuar se ka përcjellë informacione të klasifikuara te Ergys Agasi gjatë arratisë së tij.
Në fokus të mbledhjes pritet të jenë çështjet që lidhen me sigurinë kombëtare dhe mbrojtjen e informacionit të klasifikuar.
Këshilli i Sigurisë Kombëtare përbëhet nga titullarët e 13 institucioneve dhe drejtohet nga Presidenti i Republikës. Në mbledhje do të marrë pjesë edhe kryeministri Edi Rama.
Rama u shpreh më herët se Hyseni do të përballet individualisht me drejtësinë, ndërsa e cilësoi masën ndaj saj si ekstreme. Sipas kryeministrit, hetimi penal ndaj një drejtuesi të SHISH-it ka implikime që lidhen edhe me sigurinë kombëtare dhe interesat e shtetit.
Rama ka deklaruar se në Këshillin e Sigurisë Kombëtare duhet të diskutohet për garancitë e nevojshme për mbrojtjen e institucioneve të sigurisë dhe informacionit të klasifikuar në rastet kur drejtuesit e tyre bëhen subjekt i hetimeve penale.
