Shkup, 13 nëntor, Zhurnal.mk – Ministria e Drejtësisë ka publikuar Projekt-Kodin Penal dhe Projektligjin për Procedurën Penale në Regjistrin e Vetëm Kombëtar Elektronik të Rregulloreve (ENER), duke hapur kështu mundësinë për përfshirjen aktive të publikut në finalizimin e këtyre zgjidhjeve të rëndësishme ligjore – njoftojnë nga Ministria.
Nga atje theksojnë se të gjitha palët e interesuara, publiku profesional, institucionet e drejtësisë, komuniteti akademik, organizatat qytetare, si dhe qytetarët, do të kenë mundësi t’i shqyrtojnë tekstet ligjore dhe të dorëzojnë vërejtjet, komentet, propozimet dhe sugjerimet e tyre.
Në periudhën e ardhshme do të pasojnë edhe debate publike profesionale, në të cilat do të hapen çështjet dhe zgjidhjet kryesore të përfshira në të dy tekstet ligjore, me qëllim që, përmes diskutimit të argumentuar dhe shkëmbimit të mendimeve, të kontribuohet në përmirësimin e tyre. Njëkohësisht, të dy projektligjet i janë dorëzuar edhe Komisionit Evropian për mendim, me qëllim që të sigurohet një vlerësim shtesë ekspertësh për zgjidhjet e propozuara dhe përputhshmërinë e tyre me legjislacionin dhe standardet evropiane – thuhet në njoftimin e Ministrisë së Drejtësisë.
Me publikimin në ENER dhe hapjen e debatit publik, Ministria e Drejtësisë, siç theksojnë, vazhdon procesin transparent dhe gjithëpërfshirës, në të cilin çdo propozim konstruktiv mund të kontribuojë në krijimin e zgjidhjeve më të mira ligjore.
