Fondi Monetar Ndërkombëtar (FMN), ka hequr Kosovën nga lista e Shteteve në Situata të Brishtë dhe Konflikti (FCS/FCV), duke njohur përparimet e vendit në stabilitetin makro-financiar dhe forcimin e institucioneve.
Ky vendim i rëndësishëm vjen pas një njoftimi të ngjashëm nga Banka Botërore, e cila gjithashtu ka përjashtuar Kosovën nga kjo kategori.
Kryeministri në detyrë, Albin Kurti, ka thënë se pas 16-vjetëve Kosova normalizohet ndërkombëtarisht.
“Pas 16 vjetëve, Kosova normalizohet ndërkombëtarisht si shtet stabil demokratik me zhvillim ekonomik të qëndrueshëm, sipas vlerësimit edhe të FMN-së pas atij të BB-së”, ka shkruar Kurti në Facebook.
Ndryshe, Banka Qendrore e Republikës së Kosovës (BQK) ka përshëndetur fuqishëm këtë vendim, duke shprehur mirënjohje të thellë ndaj FMN-së dhe Bankës Botërore për njohjen e përpjekjeve të vazhdueshme të Kosovës për të forcuar qëndrueshmërinë ekonomike dhe institucionale.