Krime, 26 qershor Zhurnal.mk – Autoritetet e instaluara nga Rusia në Krime kanë shpallur gjendjen e jashtëzakonshme, pas shtimit të sulmeve me dronë nga Ukraina, të cilat kanë sjellë ndërprerje të mëdha të energjisë elektrike dhe mungesë karburanti në gadishull.
Më të goditurat nga mungesa e energjisë janë zonat e Sevastopolit, qytetit më të madh në Krimenë nën kontrollin rus. Mikhail Razvozhayev, guvernatori i emëruar nga Moska, tha se kufizimet në furnizimin me energji do të vijojnë, pasi ndërhyrjet për riparimin e rrjetit elektrik janë ndërprerë vazhdimisht nga alarmet ajrore të shkaktuara prej sulmeve me dronë.
Sipas Robert Brovdi, komandant i forcave ukrainase të dronëve, Ukraina goditi shtatë herë nënstacionin kryesor elektrik të Sevastopolit në orët e para të së mërkurës.
Gjatë javëve të fundit, Kievi ka rritur intensitetin e operacioneve ushtarake në Krime, me synimin për të shtuar presionin ndaj Rusisë dhe për të dëmtuar infrastrukturën logjistike dhe ushtarake në gadishull.
Krahas problemeve me energjinë, autoritetet vendore kanë pezulluar shitjen e karburantit për qytetarët dhe bizneset, duke e lënë atë në dispozicion vetëm të institucioneve shtetërore. Banorët thonë se pikat e karburantit janë bosh dhe se çmimet kanë pësuar rritje të ndjeshme.
Radhë të gjata automjetesh janë krijuar edhe në urën e Kerçit, që lidh Krimenë me jugun e Rusisë. Mijëra makina kanë qëndruar për orë të tëra në pritje të kontrollit, pasi ura u mbyll përkohësisht pas një sulmi ukrainas me dronë.
Zhvillimet kanë prekur edhe turizmin. Autoritetet kanë ndërprerë kampet verore për fëmijët deri më 1 shtator, ndërsa disa banorë raportojnë rrugë të zbrazëta, mungesë produktesh në supermarkete dhe vështirësi në transportin publik.
Megjithatë, sipas pronarëve të disa strukturave turistike, vizitorët vazhdojnë të mbërrijnë, ndonëse klima në zonë është bërë më e pasigurt.
Krimea u aneksua nga Rusia në vitin 2014, një hap që nuk njihet nga pjesa më e madhe e komunitetit ndërkombëtar. Që prej nisjes së pushtimit të plotë rus të Ukrainës në vitin 2022, Kievi ka përsëritur vazhdimisht se synon të rikthejë kontrollin mbi gadishullin.
Presidenti ukrainas Volodymyr Zelensky është shprehur se operacionet në Krime janë pjesë e një strategjie të planifikuar për ta detyruar Rusinë të pranojë negociata për paqe.
Ndërkaq, analistët vlerësojnë se, edhe pse këto sulme po rrisin presionin ndaj autoriteteve ruse dhe po ndikojnë në jetën e përditshme të banorëve të Krimesë, ato nuk pritet të ndryshojnë pozicionin strategjik të Kremlinit për luftën në Ukrainë.
