Shkup, 16 korrik, Zhurnal.mk – Kryeshefi i Shtatmadhorisë së Forcave të Armatosura të Republikës Federale të Gjermanisë, gjeneral Karsten Brojer, po qëndron për një vizitë zyrtare dyditore në Maqedoninë e Veriut, përcjell Zhurnal.mk.
Delegacioni i lartë i Forcave të Armatosura gjermane, i udhëhequr nga gjenerali Brojer, do të zhvillojë takime me shefin e Shtatmadhorisë së Armatës së Maqedonisë së Veriut, gjeneralmajor Sashko Lafçiski, si dhe me ministrin e Mbrojtjes, Vllado Misajllovski.
Vizita pritet të fokusohet në avancimin e bashkëpunimit dypalësh në fushën e mbrojtjes, modernizimin e kapaciteteve ushtarake, bashkëpunimin në kuadër të NATO-s dhe çështje të tjera me interes të përbashkët në fushën e sigurisë.
Gjermania mbetet një nga partnerët më të rëndësishëm strategjikë të Maqedonisë së Veriut në sektorin e mbrojtjes, duke ofruar mbështetje të vazhdueshme për zhvillimin dhe modernizimin e Armatës, si dhe për forcimin e stabilitetit dhe sigurisë rajonale.
