Berlin, 21 maj, Zhurnal.mk – Kancelari gjerman, Friedrich Merz ka propozuar që Ukrainës t’i ofrohet një status i ri special si “anëtare e asociuar” e Bashkimit Evropian, në përgjigje të kërkesës së Kievit për anëtarësim të shpejtë në bllok.
Në letrën drejtuar liderëve të BE-së, Merz mbështet integrimin e menjëhershëm të Ukrainës në institucionet e unionit, duke shtyrë për më vonë anëtarësimin e plotë dhe të drejtën e votës.
Sipas tij, kjo nismë justifikohet nga situata e veçantë e Ukrainës si vend në luftë, si edhe nga progresi i rëndësishëm në negociatat e anëtarësimit.
Propozimi synon gjithashtu të lehtësojë bisedimet për paqe të nisura nga presidenti amerikan Donald Trump, përfshirë përmes një angazhimi politik të shteteve anëtare të BE-së, për të zgjeruar klauzolën e mbrojtjes së përbashkët të unionit ndaj Ukrainës.
Në letër thuhet se statusi special do të dërgonte një sinjal të fortë politik për Ukrainën dhe qytetarët e saj, të cilët kanë nevojë urgjente për mbështetje në përballjen me agresionin rus.
Megjithatë, Merz e konsideron jorealist anëtarësimin e plotë të Ukrainës në BE në një të ardhme të afërt.
“Është e qartë se nuk do të jemi në gjendje ta përfundojmë procesin e anëtarësimit në një afat të shkurtër”, shkroi ai në letrën drejtuar presidentit të Këshillit Evropian António Costa, presidentes së Komisionit Evropian Ursula von der Leyen dhe presidentit qipriot Nikos Christodoulides, vendi i të cilit mban aktualisht presidencën e BE-së.
Merz përmendi “pengesa të panumërta” dhe procedura politikisht të vështira ratifikimi në disa shtete anëtare.
Kancelari gjerman propozoi që BE-ja të nisë menjëherë dhe pa vonesa negociatat për të gjitha çështjet që lidhen me anëtarësimin.
Ai kërkoi gjithashtu diskutim për “anëtarësimin e asociuar”, të cilin e cilësoi si një hap vendimtar në rrugën e Ukrainës drejt anëtarësimit të plotë.
Merz shtoi se ky status do të shkonte përtej marrëveshjes ekzistuese të asociimit dhe do të përshpejtonte më tej procesin e integrimit.
