Strasburg, 19 maj, Zhurnal.mk – Evropa nuk na u dha neve. Ajo u ndërtua traktat pas traktati, krizë pas krize, nga njerëz që zgjodhën solidaritetin mbi ndarjen dhe bashkëpunimin mbi interesin vetjak, deklaroi presidentja e Parlamentit Evropian, Roberta Metsola.
”Me Urdhrin Evropian të Meritës, ne u bëjmë homazh atyre që, në çdo fushë të jetës, zgjedhin të ndërtojnë Evropën: ata që kanë udhëhequr në kohë të vështira dhe kanë vazhduar të përparojnë Bashkimin tonë. Sepse Evropa zgjat vetëm për aq kohë sa çdo brez zgjedh ta mbrojë atë”, shtoi ajo.
“Ne u bëjmë homazh atyre që mbrojnë vlerat evropiane në parlamente, në samite, në klinika, në fusha sportive, në redaksi, në salla gjyqi, në laboratorë dhe në salla koncertesh, me dinjitetin e qetë të një jete të dedikuar për diçka më të madhe se vetja”, saktësoi ajo.
“Disa mund të mos e kenë konsideruar veten ndërtues të Evropës; ndoshta ata thjesht po ndiqnin një pasion, po ndiqnin një ideal, po mbronin një parim, por kështu ka funksionuar gjithmonë Evropa, përmes gjesteve të panumërta të vogla të njerëzve që, secili në mënyrën e vet, kanë çuar përpara bashkimin tonë”, theksoi Metsola.
“Jam krenare që kontinenti ynë është në ngritje, krenare për atë që përfaqëson flamuri ynë dhe kjo asamble për evropianët dhe për kaq shumë njerëz në mbarë botën. E shohim këtë kur njerëzit që rebelohen kundër autokracisë valëvisin flamurin tonë evropian. Përgjigja është Evropa, vendi më i drejtë për të punuar, vendi më i sigurt për të rritur një familje, superfuqia e të drejtave, lirisë dhe demokracisë”, shtoi ajo.
