Shkup, 13 korrik, Zhurnal.mk – Kryetari i Komunës së Çairit, Izet Mexhiti, ka bërë të ditur se komuna po shqyrton dy alternativa për rregullimin e vendkalimit ilegal në Bit Pazar të Shkupit.
Sipas tij, opsioni më i mundshëm është vendosja e semaforëve, ndërsa si alternativë po merret në konsideratë edhe rrënimi i urës ekzistuese, nëse konstatohet se ajo nuk është funksionale dhe paraqet pengesë.
“Jemi duke shqyrtuar dy opsione. Më i mundshmi është vendosja e semaforit, ndërsa opsioni tjetër është rrënimi i urës, pasi ajo nuk shfrytëzohet nga qytetarët në masën e duhur. Nëse rezulton se pengon zgjidhjen, mund të hiqet për të rregulluar vendkalimin, i cili është i nevojshëm, sidomos për tregtarët e Bit Pazarit”, deklaroi Mexhiti.
Ai rikujtoi se vendkalimi ishte mbyllur për një periudhë, por u rikthye pas kërkesave të tregtarëve të Bit Pazarit, të cilët e konsiderojnë atë të domosdoshëm për zhvillimin e aktivitetit të tyre ekonomik.
