Ilinden, 4 prill Zhurnal.mk – Kryeministri i vendit, Hristijan Mickoski, mori pjesë në promovimin e projektit për zgjerimin e kapacitetit të një shkolle fillore në komunën e Ilindenit, duke e cilësuar këtë investim si një hap të rëndësishëm për përmirësimin e kushteve në arsim.
Gjatë fjalës së tij, Mickoski theksoi se projekte të tilla janë dëshmi konkrete e përkushtimit për zhvillimin e komunave dhe ngritjen e standardeve për nxënësit. Ai vlerësoi punën e autoriteteve lokale, duke përgëzuar kryetarin e komunës, Ministria e Arsimit dhe Shkencës, si dhe këshilltarët dhe administratën për angazhimin në realizimin e projekteve.
Sipas tij, Komuna e Ilindenit po kalon nëpër një proces të dukshëm transformimi dhe zhvillimi të vazhdueshëm, ndërsa mbështetja e qytetarëve mbetet një tregues i qartë i rezultateve pozitive në terren.
Kryeministri falënderoi edhe deputeten që përfaqëson këtë zonë për kontributin në sigurimin e projekteve shtesë, duke nënvizuar rëndësinë e bashkëpunimit ndërinstitucional për realizimin e investimeve konkrete në dobi të qytetarëve.
Në përfundim, Mickoski theksoi se Qeveria do të vazhdojë me realizimin e projekteve zhvillimore në të gjithë vendin, duke falënderuar qytetarët e Ilindenit për mbështetjen e vazhdueshme.
