Shkup, 11 gusht, Zhurnal.mk – Ministria e shëndetësisë reagon ndaj pretendimeve të paraqitura nga partia Levica lidhur me gjendjen e skanerit PET/CT, me qëllim që publiku të marrë informacione të plota dhe të sakta.
Sipas informacioneve zyrtare të Institutit Universitar për Tomografi me Emetim Pozitronesh (IU PET), ndërprerja e tanishme është shkaktuar nga një problem teknik në prodhimin e radioizotopeve, i cili lidhet me ciklotronin. Servisi i autorizuar po punon intensivisht për sanimin e defektit, ndërsa janë ndërmarrë të gjithë hapat e nevojshëm që pajisja të rikthehet në funksion sa më shpejt që të jetë e mundur.
Duhet theksuar se problemi buron nga një neglizhencë shumëvjeçare. Gjatë viteve të kaluara nuk është zbatuar në mënyrë të vazhdueshme protokolli për mirëmbajtjen parandaluese të pompës së difuzionit, duke përfshirë pastrimin e saj të rregullt dhe ndërrimin e vajit çdo pesë vjet. Kjo gjendje është pasojë e mangësive sistemore të akumuluara gjatë një periudhe të gjatë. Menjëherë pas konstatimit të gjendjes, drejtuesit aktualë ndërmorën masa për tejkalimin e problemit.
Ndryshe nga praktika e mëparshme e neglizhencës, drejtuesit aktualë po ndërmarrin hapa konkretë dhe të vazhdueshëm për zgjidhjen afatgjatë të problemit, duke përfshirë aktivitete për furnizimin me pajisje të reja, në mënyrë që sistemi shëndetësor të mos varet më vetëm nga një pajisje e vetme.
Jemi të vetëdijshëm për vështirësitë që kjo gjendje u shkakton pacientëve me sëmundje onkologjike. Për këtë arsye, Klinika e Onkologjisë dhe Radioterapisë dhe Klinika e Hematologjisë janë informuar tashmë për kryerjen e triazhimit të mëtejshëm nëpërmjet metodave të tjera diagnostikuese të disponueshme, me qëllim që trajtimi të mos ndërpritet.
Ministria mbetet e përkushtuar për ta informuar publikun në mënyrë transparente për çdo hap në zgjidhjen e kësaj gjendjeje.
