Shkup, 9 tetor, Zhurnal.mk – Ministria e Punëve të Brendshme e njofton opinionin publik se nga e hëna (12.10.2026), sistemi i mbikëqyrjes së trafikut “Safe City” do të fillojë të funksionojë edhe në rajonin e SPB Ohër.
Pas kryerjes së kontrolleve teknike dhe testimeve përfundimtare, kamerat e sistemit do të vihen në funksion në linjat rrugore në rajonin e SPB Ohër.
Nga MPB thonë se me aktivizimin e sistemit do të mundësohet kontrolli i shtuar dhe i vazhdueshëm i qarkullimit, zbulimi në kohë i kundërvajtjeve rrugore, rritja e disiplinës në trafik dhe përmirësimi i sigurisë rrugore.
“Ministria e Punëve të Brendshme u bën apel të gjithë shoferëve që t’i respektojnë denjësisht rregullat dhe rregulloret e trafikut dhe përmes sjelljes së përgjegjshme të kontribuojnë për siguri më të madhe në trafik”, thonë nga MPB.
