Prishtinë, 20 gusht, Zhurnal.mk – Partia Demokratike e Kosovës ka kërkuar që seanca konstituive e Kuvendit të Kosovës të vazhdojë sot në orën 11:00, duke e konsideruar të domosdoshme zhbllokimin e procesit të konstituimit të legjislativit.
Kërkesa është bërë nga sekretarja e PDK-së, Vlora Çitaku, e cila i është drejtuar kryesuesit të seancës konstituive, Avni Dehari.
Në shkresën drejtuar Deharit, PDK-ja kërkon që vazhdimi i seancës të bëhet në përputhje me nenin 9 të Rregullores së Punës së Kuvendit të Republikës së Kosovës.
Sipas PDK-së, vonesat në konstituimin e Kuvendit kanë krijuar një situatë të rëndë sa i përket respektimit të Kushtetutës dhe aktgjykimeve të Gjykatës Kushtetuese.
“Moskonstituimi i Kuvendit brenda afatit të përcaktuar tashmë ka krijuar një situatë të rëndë sa i përket respektimit të Kushtetutës dhe aktgjykimeve të Gjykatës Kushtetuese”, thuhet në kërkesën e PDK-së.
Partia opozitare vlerëson se mosrespektimi i afateve procedurale të përcaktuara me Rregulloren e Kuvendit e rëndon edhe më tej situatën.
“Mosrespektimi i afateve procedurale të përcaktuara me Rregulloren e Kuvendit vetëm sa e thellon më tej këtë situatë”, thuhet në shkresë.
PDK-ja i është referuar edhe jurisprudencës së Gjykatës Kushtetuese, duke theksuar se tejkalimi i afatit kushtetues nuk e eliminon detyrimin për konstituimin e Kuvendit.
“Shkelja e afatit nuk e shuan detyrimin për konstituimin e tij”, theksohet në kërkesën e PDK-së.
