Tetovë, 6 maj Zhurnal.mk – Në kuadër të përgatitjeve për Kongresin e IX të Partisë Demokratike Shqiptare (PDSH), dega e Tetovës ka zhvilluar me sukses Kuvendin e saj Zgjedhor, duke përmbyllur të gjitha procedurat organizative në përputhje me statutin e partisë dhe standardet demokratike.
Gjatë punimeve të kuvendit, delegatët e pranishëm realizuan zgjedhjen e përfaqësuesve të degës së Tetovës për Kongresin e IX, përmes një procesi të rregullt dhe transparent votimi. Po ashtu, u miratua edhe propozim-lista për përbërjen e Kuvendit Qendror, duke reflektuar unitetin dhe konsolidimin e strukturave partiake në këtë degë.
Në fjalën e tij para kuvendarëve, kryetari i PDSH-së, Menduh Thaçi, theksoi rëndësinë e organizimit të mirëfilltë dhe përkushtimit të strukturave partiake në funksion të një Kongresi të suksesshëm, duke nënvizuar se PDSH mbetet e përkushtuar ndaj proceseve demokratike dhe përfaqësimit dinjitoz të anëtarësisë së saj.
Kuvendi i Tetovës u karakterizua nga një atmosferë konstruktive dhe pjesëmarrje aktive, duke dëshmuar gatishmërinë e degës për të kontribuar në zhvillimet e ardhshme politike të partisë.
https://www.facebook.com/share/p/18QKmFUZzc/
