Shkup, 28 prill Zhurnal.mk – Personat pa dokumente personale në Republika e Maqedonisë së Veriut tashmë do të kenë qasje më të lehtë në shërbimet shëndetësore, përmes një moduli të ri në sistemin Termini Im. Lajmi u bë i ditur nga ministri i Shëndetësisë, Azir Aliu, gjatë promovimit të protokollit për personat pa shtetësi.
Ky protokoll është rezultat i bashkëpunimit ndërmjet Ministria e Punëve të Brendshme e RMV, Ministria e Shëndetësisë e RMV dhe Misioni i OSBE-së në Shkup, me synim tejkalimin e pengesave administrative dhe përmirësimin e përfshirjes në sistemin shëndetësor.
Sipas Aliut, moduli i ri ka ndikim të drejtpërdrejtë në përmirësimin e qasjes në kujdesin shëndetësor për personat pa identitet të përcaktuar. Ata që pajisen me një numër unik identifikimi nga institucionet përkatëse, do të mund të regjistrohen në sistem dhe të përfitojnë shërbime shëndetësore të rregullta.
Përmes këtij sistemi, do të krijohet një regjistër elektronik shëndetësor, ku do të evidentohen të gjitha ekzaminimet dhe shërbimet e marra. Kjo siguron vazhdimësi të të dhënave dhe një gjurmë institucionale të rëndësishme për procedurat e mëtejshme ligjore dhe administrative.
“Personat pa shtetësi nuk duhet të mbeten pa kujdes shëndetësor. Ne jemi këtu për të garantuar që shërbimet të ofrohen në kohë dhe me cilësi,” deklaroi Aliu, duke shtuar se ky është një hap i rëndësishëm drejt zgjidhjes përfundimtare të procedurave administrative në këtë fushë.
