Kryetari i Partisë Demokratike, Sali Berisha, ka akuzuar kryeministrin Edi Rama se ka nxjerrë para cash jashtë vendit përmes avionit privat.
Në një konferencë për mediat, Berisha i bëri thirrje autoriteteve europiane që të nisin hetimet ndaj kreut të qeverisë.
“I bëj thirrje Prokurorit Publik të BE-së të ndërmarrë menjëherë hetime për këtë problem tmerrësisht shqetësues. I bëj thirrje Interpolit, Europolit dhe Eurojust-it të angazhohen në hetimet më serioze të Edi Ramës, që sillet si diktatorët e dikurshëm të Afrikës, që mbushin avionët me kartëmonedha dhe i çojnë në banka të ndryshme. Ky hetim ka një vlerë dhe rëndësi të jashtëzakonshme për shqiptarët”, tha Berisha.
Akuzat e Berishës bazohen mbi pretendimet e eurodeputetit Tomas Zdechovsky, i cili denoncoi Ramën si njeriun që përdor familjarët e tij për të transportuar para jashtë shtetit.
“Deklarata e europarlamentarit në mediat shqiptare është aktakuza më e rëndë që i bëhet personalisht Edi Ramës dhe familjarëve të tij nga një personalitet i shquar në Parlamentin Europian, i cili shprehet se ‘po ndjekim paratë’. Rikujton, pra, parimin e kapjes së mafies duke ndjekur paratë.”
Sa i përket punës së Komisionit të Reformës Territoriale, Berisha edhe një herë e cilësoi atë si manovër të kreut të qeverisë për të shpopulluar vendin. Madje, për këtë çështje, ai paralajmëroi edhe protesta.
“Tani ai kërkon të zbatojë më tej politikën e shpopullimit, duke hequr edhe 20 bashki të tjera. Zgjidhja e parë janë protestat e fuqishme në të gjitha këto bashki dhe në të gjithë vendin.”
Të enjten është afati i fundit për të depozituar raportin e Komisionit të Reformës Territoriale, teksa PS ka paralajmëruar se e ka gati edhe reformën e re, e cila parashikon reduktimin e numrit të bashkive.
/vizionplus.tv
