Shkup, 16 korrik, Zhurnal.mk – Afati për përfundimin e studimeve të ndikimit në mjedisin jetësor dhe social për hekurudhën e shpejtë të Korridorit 10 është fundi i muajit gusht, ndërsa gjatë muajit shtator do të organizohen katër debate publike për qytetarët e përfshirë nga projekti – në Shkup, Veles, Gjevgjeli dhe Demir Kapi. Këtë e njoftoi sot ministri i Transportit dhe Lidhjeve, Aleksandar Nikoloski, duke iu përgjigjur pyetjeve të gazetarëve.
Sipas ministrit, përgatitjet për ndërtimin e hekurudhës së shpejtë po zhvillohen me dinamikë të shkëlqyer. Pas prezantimeve publike të studimeve, vijon përgatitja e kontratave për financim dhe për realizimin e projektit, si dhe prezantimi i kushteve të financimit para Kuvendit.
“Gjithçka po zhvillohet sipas planit, ashtu siç kemi paralajmëruar”, deklaroi Nikoloski.
Ai konfirmoi se afati për fillimin e punimeve mbetet fundi i këtij viti, në përputhje me deklarimet e mëparshme të kryeministrit Hristijan Mickoski.
Dokument prej 1.600 faqesh që mbulon të gjitha aspektet
Nikoloski theksoi se studimet përbëjnë dokument të gjerë dhe cilësor prej rreth 1.600 faqesh, që mbulon të gjitha aspektet e projektit. Pas prezantimeve publike, dokumenti do t’i nënshtrohet rishikimit, duke përfshirë komentet e komunitetit lokal. Sipas marrëveshjes së arritur, kjo fazë duhet të përfundojë deri më 31 gusht, pas së cilës fillon konkretizimi dhe përgatitja e kontratave për financim dhe për realizim të projektit.
Detajet e financimit – të disponueshme në fund të shtatorit
I pyetur për detaje rreth financimit, ministri Nikoloski tha se deri në fund të shtatorit pritet të ketë informacione më të detajuara për publikun. Ai theksoi se, në përputhje me legjislacionin vendor, kushtet e financimit do të prezantohen në mënyrë transparente dhe publike në Kuvend, dhe se deri atëherë nuk mund të bëhen publike.
