Shkup, 3 maj, Zhurnal.mk – Në një intervistë për MIA, Ryan Knox, drejtor ekzekutiv i SALAR International nga Suedia, foli për qëndrueshmërinë e sistemit rajonal për menaxhimin e mbetjeve (RSMB), si dhe për hapat e ardhshëm në këtë proces.
Knox theksoi se vendi ndodhet në një fazë kyçe të reformave në menaxhimin e mbetjeve, ku bazat e vendosura duhet të shndërrohen në një sistem plotësisht funksional dhe të qëndrueshëm. Edhe pse progresi është i dukshëm, dallimet në kapacitetet mes komunave dhe ndërmarrjeve publike komunale mbeten sfidë. Sipas tij, pavarësisht këtyre sfidave, ndërgjegjësimi dhe angazhimi i komunave është rritur ndjeshëm, ndërsa menaxhimi i mbetjeve gjithnjë e më shumë po njihet si prioritet, me ndërmarrjet komunale që gradualisht po modernizojnë punën e tyre.
Megjithatë, sfida kryesore mbetet qëndrueshmëria e sistemit, “Kjo përfshin forcimin e sistemit financiar përmes vendosjes së një mekanizmi funksional tarifor, përmirësimin e mbledhjes së të dhënave dhe krijimin e Ndërmarrjes Publike Rajonale, e cila do të jetë kyçe për menaxhimin e infrastrukturës së re”, shtoi Knox, përcjell Zhurnal.mk.
Në periudhën e ardhshme, ai veçoi disa prioritete. Para së gjithash, bashkëpunimi ndërkomunal duhet të kalojë nga faza e planifikimit në zbatim të plotë, me struktura rajonale funksionale dhe efikase. Njëkohësisht, është e domosdoshme të rritet ndjeshëm përfshirja e qytetarëve, pasi pa pjesëmarrjen aktive të tyre sistemi nuk mund të funksionojë. Gjithashtu, qëndrueshmëria financiare dhe shfrytëzimi i procesit të anëtarësimit në BE si shtysë për reforma janë faktorë kyç për sukses.
Sipas tij, Suedia mund të shërbejë si një pikë referimi e mirë, pasi sistemi suedez funksionon mbi të njëjtat parime: bashkëpunim ndërmjet komunave, struktura të qarta menaxheriale, qëndrueshmëri financiare dhe përfshirje e fortë e sektorit civil.
“Ajo që është po aq e rëndësishme në këtë fazë është ruajtja e momentit. Me bazat kyçe tashmë të vendosura, përdorimi i vazhdueshëm i përvojave dhe mjeteve praktike të zhvilluara përmes projektit të SALAR International mund të ndihmojë në përshpejtimin e zbatimit dhe shmangien e vonesave”, theksoi Ryan Knox për MIA.
Nëse këto procese vazhdojnë me të njëjtin ritëm dhe koordinim, vendi ka një perspektivë të qartë për transformim dhe një mundësi reale për të ndërtuar një sistem modern të menaxhimit të mbetjeve, i cili jo vetëm që do të jetë në përputhje me standardet e Bashkimit Evropian, por do të sjellë edhe përfitime konkrete për qytetarët.
Intervistën e plotë mund ta lexoni këtu KLIKO
