Shkup, 25 qershor, Zhurnal.mk – Deputetja e VLEN-it, Saranda Imeri, ka reaguar ndaj deklaratave të deputetes Ilire Dauti, të bëra në emisionin “Click Plus”, ku kjo e fundit kritikoi pushtetin për disa çështje politike dhe institucionale.
Gjatë intervistës, Dauti u pyet edhe për epitetin “luaneshë”, që i është atribuar nga qytetarët. Ajo u shpreh se ndihet mirënjohëse për këtë vlerësim, duke theksuar se e sheh si një formë mbështetjeje për angazhimin dhe politikat që përfaqëson.
“U jam shumë mirënjohëse dhe falënderuese”, deklaroi Dauti, duke shtuar se ky epitet pasqyron mbështetjen që qytetarët u japin qëndrimeve të saj politike.
Pas kësaj, përmes një reagimi në Facebook, deputetja e VLEN-it, Saranda Imeri, e kritikoi Dautin, duke pretenduar se ajo e ka fituar mandatin falë votave të Bashkimit Demokratik për Integrim (BDI).
“E shoh se sonte Ilirja qenka vërsulur shumë ndaj VLEN-it. Unë vetëm mund t’i them se, përveç faktit që mandatin e mori falë BDI-së, pasi në zgjedhjet e fundit kishte vetëm 777 vota bashkë me kryetarin e saj, e vetmja gjë që ajo dhe ministri i saj i Drejtësisë bënë ishte të merren me kthimin e Gruevskit nga Hungaria dhe të votojnë ligjin e ‘branitellave’. Punë të mbarë, ‘luaneshë’”, ka shkruar Imeri.
