Shkup, 08 maj, Zhurnal.mk – Ministri i Mjedisit Jetësor dhe Planifikimit Hapësinor, Muamet Hoxha, ka realizuar sot takim me sekretarin e sapoemëruar shtetëror, Selatin Beluli, me ç’rast i ka uruar sukses në detyrën e re brenda institucionit.
Sipas Ministrisë, emërimi i Belulit vjen në një periudhë të rëndësishme për implementimin e politikave mjedisore dhe forcimin e kapaciteteve administrative të institucionit.
Selatin Beluli ka një përvojë shumëvjeçare në administratën shtetërore. Gjatë karrierës së tij ai ka mbajtur funksione të rëndësishme, përfshirë detyrën e drejtorit të Agjencisë për Punësim, si dhe atë të sekretarit shtetëror në Ministrinë e Arsimit dhe Shkencës.
Ai është i diplomuar në Fakultetin Filozofik pranë Universitetit “Shën Kirili dhe Metodi” në Shkup.
Ministri Hoxha theksoi se përvoja dhe profesionalizmi i Belulit do të jenë një vlerë e shtuar për funksionimin efikas të Ministrisë dhe për realizimin me sukses të prioriteteve strategjike në fushën e mjedisit jetësor dhe planifikimit hapësinor.
