Shkup, 17 nëntor, Zhurnal.mk – Ka nisur grumbullimi i rendimentit të sivjetshëm me çmim prej 435 denarësh për kilogram duhan të klasës së parë, deklaroi ministri i Bujqësisë, Pylltarisë dhe Ekonomisë së Ujërave, Borçe Serafimovski, gjatë vizitës në pikën grumbulluese të Kombinatit të Duhanit në Prilep, i cili sot ka të hapura 34 pika grumbulluese, ku deri më tani janë grumbulluar më shumë se gjashtë tonë duhan.
“Presim që më shumë se 96 për qind e duhanit të blihet si klasë e parë, që do të thotë se do të arrijmë ta mbajmë çmimin. Ky çmim është edhe me kërkesë të vetë duhanprodhuesve”, tha ministri Borçe Serafimovski.
Ai informoi se sipërfaqet e mbjella me duhan këtë vit janë rritur në krahasim me vitin e kaluar dhe arrijnë rreth 15.100 hektarë, duke theksuar se pritet një prodhim prej 26 deri në 30 milionë kilogramësh, i cili do të blihet sipas kontratave të lidhura më parë.
“Në bisedë me Unionin e Duhanprodhuesve dhe me duhanprodhuesit e tjerë do të propozojmë një zgjidhje të re, përkatësisht rritjen e subvencionit nga 80 në 90 denarë, sepse duam t’i dalim në ndihmë pjesës më të madhe të duhanprodhuesve dhe bujqve që e dorëzojnë duhanin e tyre”, paralajmëroi ministri Borçe Serafimovski, duke sqaruar se do të propozohen ndryshime në vetë programin, ku masa bazë dhe nafta e gjelbër të hiqen, por në vend të kësaj të marrin edhe 10 denarë shtesë subvencion për duhanin.
Duhani i klasës së dytë blihet me çmim prej 370 denarësh, ndërsa ai i klasës së tretë me 305 denarë për kilogram.
Inspektorati Shtetëror i Bujqësisë ndodhet në terren që nga dita e parë e grumbullimit, ndërsa në ditët në vijim kontrollet do t’i përfshijnë të gjitha 317 pikat grumbulluese të dhjetë blerësve të regjistruar në vend.

