Kryetari i grupit parlamentar të Partisë Socialiste, Taulant Balla bëri të ditur sot Partia Socialiste dhe Partia Demokratike do t’i drejtohen Kuvendit me dy raporte për sa i përket kërkesës së Prokurorisë së Posaçme kundër Korrupsionit dhe Krimit të Organizuar, për dhënien e autorizimit për arrestimin e zv/kryeministres Belinda Balluku.
Në një prononcim për mediet në përfundim të mbledhjes së Këshillit për Rregulloren, Mandatet dhe Imunitetin, Balla theksoi se Kuvendi ka marrë kohën e nevojshme për sa kohë u përfshi edhe Gjykata Kushtetuese në proces.
“Edhe vetë Gjykata e Apelit pranë SPAK pati pezulluar shqyrtimin e pezullimit sepse po shprehej Gjykata Kushtetuese”, tha Balla.
Ndërkohë Balla u shpreh se në mbledhjen e sotme pyetjet e të gjithë deputetëve ndaj të dyja palëve të përfaqësuara hodhën dritë mbi shumë çështje që lidhen me elementin thelbësor të Kushtetutës, prezumimin e pafajësisë.
“Në përfundim të këtij procesi u pa se deputetët demokratë nuk kishin nevojë për shqyrtim, pasi e kishin gati vendimin e tyre. Ndërsa në emër të pesë deputetëve të PS-së, kam informuar Këshillin e Mandateve se sa i përket kërkesës për dhënien e menjëhershme të autorizimit ne nuk ishim dakord me mënyrën e propozuar”, tha Balla.
Balla bëri të ditur se fillimisht do të informohet grupi parlamentar i PS-së, ndërsa shtoi se autorizimin nuk e jep Këshilli i Mandateve, por Kuvendi në seancë plenare.
“Në përfundim të këtij procesi, sapo të jetë hartuar plotësisht raporti nga deputeti Ulsi Manja në emër të deputetëve të PS-së në Këshill, do t’i drejtohemi seancës plenare. Edhe deputetët e PD-së do të kenë raportin e tyre”, tha Balla.
