Uashington, 9 korrik Zhurnal.mk – Presidenti amerikan Donald Trump ka ngritur mundësinë e një reduktimi të mëtejshëm të pranisë ushtarake amerikane në Evropë, duke e lidhur çdo vendim me arritjen e një marrëveshjeje të mundshme për të ardhmen e Groenlandës.
“Nuk e kam marrë ende vendimin përfundimtar. Gjithçka do të varet nga Groenlanda”, tha presidenti Trump në bordin e avionit presidencial “Air Force One”, kur u pyet nëse do të tërhiqte më shumë trupa amerikane nga Evropa.
Presidenti Trump shtoi se gjithçka do të varet nga fakti nëse ai do të arrijë atë që e quajti “një marrëveshje shumë të mirë për Groenlandën”, duke shtuar; “ndoshta do ta arrij.”
Pak pasi mbërriti në samitin e NATO-s në Ankara, Trump deklaroi gjithashtu se Groenlanda, e cila është pjesë e Mbretërisë së Danimarkës, “duhet të jetë nën kontrollin e Shteteve të Bashkuara”.
Më herët, një zyrtar i lartë amerikan kishte bërë të qartë se, sipas Uashingtonit, marrja nën kontroll e Groenlandës është mënyra e vetme për të përballuar rreziqet afatgjata të sigurisë që lidhen me ishullin.
Kryeministrja daneze, Mette Frederiksen, e hodhi poshtë me vendosmëri këtë kërkesë.
Në fillim të këtij viti, Trump kishte kërcënuar hapur se do të merrte nën kontroll Groenlandën, duke tensionuar marrëdhëniet me Danimarkën, aleate e NATO-s, dhe duke ngritur dyshime mbi kohezionin e aleancës më të madhe ushtarake në botë, si edhe mbi besnikërinë e ndërsjellë mes anëtarëve të NATO-s.
Ai argumentoi se territori që i përket Danimarkës nuk do të ishte i sigurt përballë Rusisë dhe Kinës, duke pretenduar se kjo përbënte një problem për interesat e sigurisë kombëtare të Shteteve të Bashkuara.
Më vonë, Trump u tërhoq nga kërcënimi për përdorimin e forcës ushtarake nëse do të ishte e nevojshme dhe hoqi dorë edhe nga paralajmërimi për vendosjen e tarifave ndëshkuese ndaj Gjermanisë dhe vendeve të tjera evropiane, në rast se ato nuk do të pranonin t’ia shisnin ishullin SHBA-së.
Megjithatë, ai vazhdoi të këmbëngulë në pretendimet e tij për Groenlandën. Qeveritë e Danimarkës dhe të Groenlandës kanë refuzuar vazhdimisht çdo ide për aneksimin e ishullit nga Shtetet e Bashkuara.
