Tiranë, 8 maj, Zhurnal.mk – Rektori i Universitetit Bujqësor të Tiranës (UBT) Fatbardh Sallaku, mirëpriti në takim zyrtar në ambientet e universitetit, ambasadoren e Hungarisë në Shqipëri, Martina Kasnyik, në kuadër të forcimit të bashkëpunimit me partnerë dhe institucione europiane.
Gjatë takimit u theksua rëndësia e zgjerimit të marrëdhënieve akademike dhe shkencore mes dy vendeve, ndërsa u bë e ditur se javën e ardhshme UBT pritet të nënshkruajë një Memorandum Mirëkuptimi (MoU) me një universitet homolog hungarez.
Sallaku tha se, “kjo marrëveshje synon të nxisë shkëmbimet e studentëve dhe stafit akademik, bashkëpunimin në projekte kërkimore, si dhe zhvillimin e iniciativave të përbashkëta në fushën e arsimit dhe shkencës”.
Ambasadorja Kasnyik do të jetë gjithashtu pjesë e aktiviteteve të konferencës ndërkombëtare CASEE 2026, e cila do të zhvillohet javën e ardhshme në ambientet e UBT.
“Pjesëmarrja e saj në këtë konferencë vlerësohet si një tregues i rëndësishëm i rolit që Universiteti Bujqësor i Tiranës po luan në ndërkombëtarizimin e arsimit të lartë dhe në forcimin e lidhjeve akademike me universitetet dhe institucionet europiane”, u shpreh Salaku.
